Një protestues që vraponte drejt presidentit francez Emmanuel Macron, i cili është në një vizitë zyrtare në Holandë, u desh të ndalohej në tokë nga forcat e sigurisë.

Ky episod, i dyti në 24 orë, ndodhi teksa presidenti francez po mbërrinte për një ngjarje në kampusin e Universitetit të Amsterdamit.

Dje, fjalimi i tij në Hagë u ndërpre nga protestuesit që thërrisnin slogane, pas disa javësh protestash në Francë kundër reformës jopopullore të pensioneve.

Burri po këndonte, në frëngjisht, por me theks të huaj, një varg të kënduar nga protestuesit në Francë:

“Ne jemi këtu, ne jemi këtu, edhe nëse Macron nuk dëshiron, ne jemi këtu.”

Zemërimi për ligjin e pensioneve, i cili rrit moshën e daljes në pension me dy vjet, e ka përndjekur  vizitën e presidentit francez në Holandë.

Të martën, ai po përpiqej të dëgjohej ndërsa një burrë tjetër i bërtiste se “demokracia franceze ka humbur”.

Më pas, ai arriti të mbajë fjalimin e tij për Evropën.

Përveç zemërimit për politikën e brendshme, që e shoqëroi Macron edhe në Holandë, Presidenti francez kritikohet edhe nga SHBA dhe aleatët e tij evropianë për politikën e tij të jashtme.

Zyrtarët francezë po përpiqen të përmbajnë dëmin, zemërimin dhe konfuzionin e shkaktuar javën e kaluar nga komentet e Macron për reduktimin e varësisë së Evropës nga SHBA dhe marrëdhëniet e BE-së me Kinën dhe Tajvanin.

Në një postim sot, ai përsëriti se Evropa duhet të mbrojë të drejtat e saj, pa iu referuar komenteve të tij për Kinën.

“Një Evropë që mbron interesat dhe vlerat e saj, është në krye të fatit të saj, krijon vende pune dhe menaxhon tranzicionin klimatik – kjo është ajo që ne po ndërtojmë,” tha ai.

Në Francë, sindikatat po planifikojnë një ditë tjetër aksioni mbarëkombëtar për të enjten.

Sondazhet tregojnë se shumica e votuesve janë kundër reformës dhe mbështesin protestat.

Këshilli Kushtetues pritet të vendosë të premten nëse ligji dhe mënyra se si u miratua është në përputhje me kushtetutën, apo nëse opozita mund të fillojë mbledhjen e nënshkrimeve për të organizuar një referendum kundër tij.

Nëse Këshilli jep “dritën jeshile”, ligji do të publikohet dhe zbatohet. Macron ka thënë se dëshiron që ai të hyjë në fuqi përpara fundit të vitit.