Një incident i pazakontë ka shkaktuar panik në bordin e një avioni të American Airlines më 11 shtator, pasi një pasagjere dyshohet se u zhvesh plotësisht dhe kreu veprime të pahijshme para udhëtarëve të tjerë.
Ngjarja ndodhi gjatë fluturimit 1779, i cili ishte nisur nga Aeroporti Ndërkombëtar Baltimore/Washington me destinacion Miamin.
Sipas raportimeve, drejtuesja e kabinës njoftoi autoritetet për situatën, duke raportuar se pasagjerja, e ulur në vendin 9D, kishte hequr të gjitha rrobat dhe ishte përfshirë në sjellje të papërshtatshme në prani të personave të tjerë në avion.
Informacioni për incidentin iu përcoll Qendrës së Operacioneve të Integruara të American Airlines, së bashku me kërkesën për ndërhyrjen e autoriteteve.
Nuk dihet nëse ekuipazhi mori masa konkrete për ta kufizuar pasagjeren gjatë fluturimit. Ndërkohë, incidenti është regjistruar edhe përmes sistemit ACARS, i cili përdoret për komunikimin dhe raportimin e të dhënave të avionëve.
Pas uljes në Aeroportin Ndërkombëtar të Miamit, gruaja u arrestua nga policia.
Ngjarja ndodh vetëm pak ditë pas një tjetër incidenti në një avion të American Airlines. Më 6 shtator, një pasagjer u neutralizua dhe u lidh me shirit ngjitës dhe rripa sigurie nga persona në bord, pasi dyshohet se kishte bërë komente raciste dhe homofobike.