Zëvendëspresidenti i Shteteve të Bashkuara, JD Vance, ka njoftuar se të hënën do të jetë prezantuesi i një episodi të veçantë të emisionit konservator “The Charlie Kirk Show”.
Ky emision do të transmetohet drejtpërdrejt nga Shtëpia e Bardhë. Ky veprim vjen si një homazh për mikun e tij të ngushtë, komentatorin politik Charlie Kirk, i cili u vra me armë zjarri javën e kaluar gjatë një vizite në kampusin e Universitetit të Luginës së Utah-ut.
Në një postim në rrjetin social “X”, Vance ndau një foto nga zyra e tij në Shtëpinë e Bardhë, duke treguar përgatitjet për emisionin, ndërsa theksoi se kjo është mënyra e tij për të nderuar kujtimin e një prej njerëzve më të rëndësishëm në jetën e tij politike dhe personale. Ai kujtoi se Kirk ishte ndër të parët që e mbështeti kur vendosi të kandidonte për Senatin amerikan në vitin 2021 dhe luajti rol kyç në afrimin e tij me Donald Trump Jr., si dhe në përzgjedhjen e kandidatit për zëvendëspresident në fushatën e Trump për vitin 2024.
Kirk, një figurë e njohur e së djathtës amerikane dhe themelues i organizatës “Turning Point USA”, humbi jetën pas një sulmi me armë, i cili është ende nën hetim nga autoritetet. JD Vance ka shërbyer si një nga mbajtësit e arkivolit gjatë kthimit të trupit të Kirkut në shtetin e tij të lindjes, Arizona. Në një letër publike pas vdekjes së tij, zëvendëspresidenti shprehu pikëllimin e thellë, duke thënë se “Zoti kishte plane të tjera” dhe se tashmë Kirk është “në parajsë, duke folur me të Madhin në emër të vendit që e donte”.
Emisioni special që do të drejtohet nga JD Vance pritet të transmetohet në mesditë, dhe ka ngjallur interes të madh në radhët e ndjekësve të politikës amerikane dhe mbështetësve të së djathtës konservatore.