Është rënduar bilanci i ngjarjes tragjike të ndodhur në Zvicër, ku një resort skish u përfshi nga flakët.
Sipas raportimeve të fundit nga mediat e huaja, rreth 40 persona dyshohet se kanë vdekur dhe 100 të tjerë janë plagosur. Shpërthimi ndodhi rreth orës 1:30 të mëngjesit sipas orës lokale (12:30 të mëngjesit GMT) në qytetin alpin Crans-Montana. Tragjedia ndodhi ndërsa po festohej Viti i Ri në një bar, i cili është i njohur për turistët.
Imazhet e publikuara nga mediat lokale tregojnë një ndërtesë të përfshirë nga flakët dhe shërbimet e emergjencës aty pranë. E përditshmja zvicerane Blick citoi një mjek në vendngjarje i cili sugjeroi se numri i të vdekurve mund të jetë në “dhjetëra”. E përditshmja rajonale Le Nouvelliste tha gjithashtu se burimet e saj po përshkruanin “një numër të madh viktimash”, me “rreth 40 të vdekur dhe 100 të plagosur”. Ka raportime se shpërthimi mund të jetë shkaktuar nga fishekzjarrët, megjithatë policia thotë se kjo ende nuk është konfirmuar.
