Një ngjarje e rëndë ka tronditur opinionin publik në Palermo, ku një vajzë 11-vjeçare ka ndërruar jetë në rrethana ende të paqarta. E mitura u dërgua me urgjencë në Spitalin “Buccheri La Ferla” në gjendje kritike, me rroba të lagura me benzinë dhe shenja dhune në qafë. Pavarësisht përpjekjeve të mjekëve, ajo ndërroi jetë pak minuta pas mbërritjes në spital.
Ngjarja ka vënë në lëvizje menjëherë Zyrën e Prokurorit për të Mitur, e cila ka nisur një hetim të hollësishëm për të zbardhur shkaqet e vdekjes. Edhe pse pista e vrasjes është përjashtuar për momentin, është urdhëruar autopsia për të përcaktuar me saktësi rrethanat e ngjarjes. Ekspertiza mjeko-ligjore do të kryhet pranë Institutit të Mjekësisë Ligjore në Poliklinikën e Palermos.
Vajza, e cila vuante nga epilepsi rezistente, paralizë dhe encefalit i rëndë, ishte shoqëruar në spital nga nëna e saj 31-vjeçare dhe partneri i saj. Të dy janë marrë në pyetje nga autoritetet. Sipas burimeve, familja jetonte në një banesë njëkatëshe në një zonë gjysmë-periferike të qytetit, e cila është tashmë e sekuestruar nga policia. Brenda saj është gjetur dhe sekuestruar edhe një shishe e vogël me benzinë.
Ndërkohë, janë marrë dëshmi edhe nga banorët e zonës, të cilët kanë deklaruar se nuk kanë parë apo dëgjuar ndonjë gjë të pazakontë. Në vendngjarje ka mbërritur edhe babai biologjik i vajzës, i cili është informuar menjëherë pas incidentit.
Për shkak të natyrës së ndjeshme të rastit dhe për të garantuar sigurinë e të miturve, tre fëmijët e tjerë të gruas janë vendosur përkohësisht në një strukturë shtetërore kujdestare.
Hetimet janë ende në fazën fillestare, ndërsa autoritetet po mbledhin dëshmi dhe prova të tjera për të kuptuar me saktësi se çfarë ndodhi në orët e fundit të jetës së vajzës.