Të paktën 25 persona kanë humbur jetën në një aksident tragjik në ishullin Fogo, në Kepin e Gjelbër, pasi një autobus doli nga rruga dhe ra në një humnerë nga një lartësi prej rreth 30 metrash.
Në autobus ndodheshin rreth 35 persona. Sipas agjencisë kombëtare të lajmeve Inforpress, shumica e viktimave ishin nxënës të arsimit fillor dhe të mesëm, ndërsa drejtuesi i autobusit ishte gjithashtu mes personave që humbën jetën.
Aksidenti ndodhi mbrëmjen e së shtunës, kur autobusi humbi kontrollin dhe përfundoi në një greminë. Shumë prej pasagjerëve humbën jetën në vendngjarje.
Presidenti i Kepit të Gjelbër, José Maria Pereira Neves, e cilësoi ngjarjen si një “katastrofë të madhe”, duke shprehur dhimbjen për viktimat.
Autoritetet kanë nisur hetimet për të zbardhur shkaqet e aksidentit. Ende nuk dihet se çfarë shkaktoi daljen e autobusit nga rruga dhe rënien në humnerë.