Një tubim elektoral në Indi, i organizuar nga aktori i njohur dhe politikani në ngjitje, Vijay, ka përfunduar në një ngjarje tragjike. Të paktën 40 persona kanë humbur jetën, ndërsa më shumë se 50 të tjerë po marrin trajtim mjekësor pas një përplasjeje masive në shtetin jugor të Tamil Nadu.
Sipas autoriteteve, viktimat përfshijnë burra, gra dhe fëmijë. Kryeministri i Tamil Nadu-t, M.K. Stalin, konfirmoi bilancin e rëndë dhe njoftoi se një komision i posaçëm do të hetojë shkaqet e incidentit, ndërsa familjet e viktimave do të marrin kompensim financiar.
Pamjet e publikuara nga mediat lokale tregojnë turmën që shtyhej përpara në pritje të Vijay-t, i cili mbërriti me vonesë në vendin e ngjarjes. Mësohet se mungesa e ujit dhe ushqimit për disa orë e përkeqësoi situatën, duke shkaktuar panik dhe shtypje masive.
Aktori-politikan reagoi menjëherë pas ngjarjes, duke e quajtur atë “ditën më të dhimbshme të jetës së tij” dhe shprehu ngushëllime për familjet e viktimave.
Ky është incidenti i dytë i rëndë i shënuar gjatë tubimeve të Vijay, pas tragjedisë së tetorit 2024, ku humbën jetën gjashtë persona.