Të paktën 13 persona kanë humbur jetën pas një zjarri të fuqishëm që përfshiu një fabrikë fishekzjarrësh në rajonin Yaroslavl të Rusisë.
Ngjarja ka ndodhur në fshatin Kubrinsk, pranë qytetit Pereslavl-Zalessky, ku flakët përfshinë ambientet e uzinës dhe shkaktuan dëme të mëdha.
Sipas agjencisë shtetërore ruse TASS, duke cituar shërbimet e emergjencës, zjarri shkatërroi plotësisht dy ndërtesa të fabrikës. Rreth 100 zjarrfikës u angazhuan në operacionin për izolimin dhe shuarjen e flakëve.
Guvernatori i rajonit Yaroslavl, Mikhail Evrayev, konfirmoi përmasat e ndërhyrjes së emergjencës.
Ndërkohë, autoritetet ruse kanë nisur një hetim penal paraprak, me fokus te dyshimet për shkelje të rregullave të sigurisë në uzinë.
Shkaqet që shkaktuan zjarrin, si dhe rrethanat e sakta që çuan në humbjen e jetëve, mbeten ende nën hetim.