“Vera e vitit 2025 mund të jetë e fundit që përjetojmë në paqe.” Me këtë paralajmërim tronditës, historiani dhe profesori gjerman i çështjeve ushtarake, Sönke Neitzel, ngriti shqetësime të mëdha si në Gjermani, ashtu edhe në mbarë Evropën. Në një intervistë për NDR, ai shpjegoi se rreziku kryesor vjen nga Rusia dhe se Perëndimi nuk duhet të mbështetet tek optimizmi, por të përgatitet për skenarin më të keq.

Sipas tij, Bundeswehr – ushtria gjermane – ndodhet në gjendje të dobët dhe vuan nga mungesa e funksionalitetit. Çdo reformë e thellë do të ishte një sfidë e vështirë për qeverinë aktuale në Berlin, e cila shihet si e dobët. Neitzel thekson se reformat e ardhshme nuk do të mjaftojnë për të garantuar sigurinë që Gjermania dhe Evropa kërkojnë. Ai sugjeron që fokusi kryesor i ushtrisë gjermane duhet të jetë: mbrojtja nga dronët, forca ajrore dhe sigurimi i rezervave të mjaftueshme të municioneve.

Kina – faktori i paparashikueshëm

Ndërkohë, tensionet rriten edhe në Azi. Analisti i NDR-së, Stefan Niemann, paralajmëron se lëvizjet gjithnjë e më agresive të ushtrisë kineze pranë brigjeve të Tajvanit janë një sinjal alarmi. Presidenti Xi Jinping mund të shohë luftën në Ukrainë si një mundësi për të ndërmarrë një ofensivë kundër Tajvanit.

Edhe pse Kina e konsideron Tajvanin si pjesë të territorit të saj, ishulli funksionon si shtet i pavarur me qeveri demokratike. Pekini ka rritur stërvitjet ushtarake rreth tij, duke simuluar bllokada dhe sulme mbi infrastrukturën kritike. Qëllimi i këtyre manovrave është presioni politik dhe psikologjik mbi Tajvanin, por edhe demonstrimi i fuqisë ushtarake kineze.

Kërcënimi i pushtimit të Tajvanit

Kina ka paralajmëruar se do të përdorë forcën nëse Tajvani shpall zyrtarisht pavarësinë. Kërcënimet janë shoqëruar nga ushtrime ushtarake me transportues avionësh dhe mjete luftarake moderne. Tajvani ka përforcuar mbrojtjen e tij, por varet shumë nga mbështetja amerikane. Aktit i Marrëdhënieve me Tajvanin (1979) detyron SHBA-të të sigurojnë mjetet për vetëmbrojtjen e ishullit.

Në vitet e fundit, Uashingtoni ka rritur ndjeshëm praninë ushtarake në rajonin e Azi-Paqësorit dhe ka shtuar furnizimet me armë për Tajvanin. Sekretari amerikan i Mbrojtjes, Pete Hegseth, i ka garantuar Tajvanit një “frenim të besueshëm”, duke nënkuptuar se SHBA do të marrë çdo masë për të penguar një pushtim të lehtë nga Kina.

Rreziku global

Një konflikt i armatosur mes SHBA-së dhe Kinës do të kishte pasoja shkatërruese, duke përfshirë edhe rrëzimin e ekonomisë botërore. Pekini ka modernizuar ndjeshëm ushtrinë e tij, me sisteme të avancuara raketash, flotë avionësh dhe transportues të rinj, duke ndërtuar gjithashtu aleanca ushtarake me vende si Rusia dhe Irani.

Për analistët e sigurisë, ky skenar përfaqëson rrezikun më të madh të dekadës: një përplasje mes fuqive të mëdha, që mund të ndryshojë balancën globale të forcës.