Një konflikt familjar përfundoi në një ngjarje tragjike në Florida, ku një burrë 47-vjeçar, nën ndikimin e alkoolit, vrau bashkëshorten e tij, plagosi rëndë vajzën 13-vjeçare dhe më pas i dha fund jetës së tij, bëjnë me dije autoritetet lokale.
Sipas Sherifit të Qarkut Polk, Grady Judd, autori i ngjarjes, Jason Kenney, ishte përfshirë në një debat të ashpër me gruan e tij, Crystal Kenney, pasi ajo i kishte kërkuar të fikte ndeshjen e NFL-së mes San Francisco 49ers dhe Indianapolis Colts, që transmetohej në “Monday Night Football”.
Situata u përshkallëzua aq shumë, sa Crystal Kenney i kërkoi djalit të saj 12-vjeçar të njoftonte policinë. Fëmija u largua me vrap drejt shtëpisë së një fqinji, ku pak më vonë dëgjoi të shtëna me armë zjarri, raporton New York Post.
Kur forcat e rendit mbërritën në banesë, gjetën gruan të pajetë, ndërsa vajza 13-vjeçare ishte plagosur në fytyrë dhe në shpatull. E mitura u transportua me urgjencë në spital në gjendje kritike, por arriti të mbijetojë dhe të japë dëshmi para autoriteteve.
Djali 12-vjeçar i familjes nuk u lëndua, ndërsa vajza njëvjeçare e çiftit u gjet e sigurt, duke fjetur në krevatin e saj. Jason Kenney ishte njerku i dy fëmijëve më të mëdhenj të Crystal Kenney.
Pas ngjarjes, 47-vjeçari u largua nga shtëpia dhe telefonoi motrën e tij në New York, duke i thënë se kishte kryer “diçka shumë të keqe” dhe se nuk do të flisnin më kurrë. Më pas ai shkoi në banesën e babait të tij. Gjatë përpjekjeve të policisë për ta bindur të dorëzohej nga një hangar në oborr, ai qëlloi veten, duke humbur jetën.
Gjatë kontrollit të banesës, autoritetet gjetën një shënim të shkruar nga Crystal Kenney, ku ajo i kërkonte bashkëshortit të kërkonte ndihmë për varësinë nga alkooli dhe drogat. Në shënim ajo shprehej se sjellja e tij po shkatërronte familjen dhe se kishte nevojë për ndihmë shpirtërore.
Fëmijët që mbijetuan tragjedisë janë vendosur nën kujdesin e gjyshërve. “Një familje e tërë u shkatërrua,” deklaroi Sherifi Grady Judd, duke shtuar se skena e gjetur në banesë ishte tejet tronditëse, veçanërisht për shkak të atmosferës festive të Krishtlindjeve që mbizotëronte në shtëpi.