Një ngjarje e rëndë ka tronditur Irlandën, ku një 88-vjeçar u rrah brutalisht për vdekje nga një pacient tjetër në një spital në Cork.
Matthew Healy humbi jetën pasi u sulmua në shtratin e tij në Mercy University Hospital, ndërsa autori, 33-vjeçari Dylan Magee, ishte në gjendje halucinacionesh dhe bërtiste se viktima “i kishte ngrënë djalin”.
Familja e të ndjerit ka kërkuar nga gjykata dënimin maksimal për autorin. Vajza e viktimës, Claire Healy, deklaroi:
“Kur dëgjova se babai ishte sulmuar, mendova se ishte një makth nga i cili do të zgjohesha. Por nuk do të zgjohem kurrë nga ky makth.”
Ajo shtoi se babai i saj meritonte një fund të qetë dhe jo “të shtrihej i tmerruar dhe të vdiste pasi u rrah brutalisht nga një njeri që bërtiste se ai i kishte ngrënë fëmijët”.
Sipas hetimeve, autori e sulmoi të moshuarin në orët e para të mëngjesit, duke e goditur disa herë ndërsa viktima ishte në gjumë.
Gjykata kishte vendosur më herët se Magee është fajtor për vrasje nga pakujdesia me përgjegjësi të zvogëluar, pasi gjendja e tij mendore ishte e dëmtuar në momentin e krimit.
Megjithatë, familja e viktimës kundërshton këtë, duke theksuar:
“Ne jemi produkt i zgjedhjeve tona dhe nuk do të pranoj kurrë justifikime që ai nuk ishte përgjegjës për veprimet e tij.”
Vendimi përfundimtar për dënimin pritet të jepet më 17 prill.