Tronditëse në Angli, katër burra akuzohen se abuzuan seksualisht me një grua që e drogoi bashkëshorti i saj për 13 vite me radhë

Një çështje tronditëse e abuzimit seksual po shqyrtohet në Gjykatën e Kurorës në Winchester të Britanisë së Madhe, ku katër burra akuzohen për vepra seksuale ndaj Joanne Young, pasi bashkëshorti i saj i atëhershëm dyshohet se e drogoi dhe e reklamoi në platforma online pa dijeninë dhe pëlqimin e saj.

Sipas të dhënave të paraqitura në gjykatë, Philip Young, 50 vjeç, ish-këshilltar, ka pranuar se e ka droguar dhe përdhunuar bashkëshorten e tij përgjatë një periudhe 13-vjeçare. Ai dyshohet gjithashtu se publikonte njoftime në platforma si Craigslist dhe Grindr, si dhe në faqe për shkëmbimin e partnerëve, duke ftuar burra të tjerë të kryenin marrëdhënie seksuale me të.

Katër të akuzuarit, Norman Mackson, Richard Wilkins, Connor Sanderson-Doyle dhe Mohammed Hassan, janë deklaruar të pafajshëm për akuzat që rëndojnë ndaj tyre.

Prokurorja Sarah Jones KC i tha jurisë se çështja ngre një pyetje thelbësore mbi pëlqimin seksual dhe nëse mund të konsiderohet e pranueshme kryerja e marrëdhënieve me një grua që nuk është në dijeni të asaj që po ndodh.

Sipas dëshmisë së paraqitur në gjykatë, Joanne kishte besuar se marrëdhënia me bashkëshortin ishte monogame. Ajo tregoi për një episod në vitin 2023, kur u zgjua e lidhur dhe me sytë e mbuluar, ndërsa një burrë kryente një akt seksual me të. Ajo mendonte se personi ishte bashkëshorti i saj, por, sipas prokurorisë, në të vërtetë ai po drejtonte një tjetër person, pa dijeninë e saj.

Prokuroria pretendon se Philip Young e paraqiste situatën si një fantazi seksuale të përbashkët, megjithëse nuk kishte prova që Joanne të kishte dhënë pëlqimin e saj. Fotot e publikuara në internet, sipas saj, e tregonin gruan të lidhur në shtrat dhe me sytë e mbuluar.

Përveç akuzave për përdhunim dhe sulme seksuale, ish-bashkëshorti ka pranuar edhe akuza për filmime të fshehta në situata intime, administrim të substancave dhe publikimin e më shumë se 500 imazheve dhe videove intime të gruas pa pëlqimin e saj. Veprimet e dyshuara përfshijnë periudhën nga viti 2010 deri në vitin 2024.

Në këtë çështje është i përfshirë edhe Dean Hamilton, 47 vjeç, i cili ka pranuar fajësinë për akuza që përfshijnë përdhunim dhe sulme seksuale me penetrim.

Procesi gjyqësor pritet të zgjasë deri në katër javë, ndërsa vendimet për dënimin e Philip Young dhe Dean Hamilton do të jepen në përfundim të gjyqit.