Presidenti i SHBA-së, Donald Trump, ka deklaruar se gjatë bisedimeve me presidentin kinez Xi Jinping ka ngritur çështjen e lirimit të ish-manjatit të mediave në Hong Kong, Jimmy Lai, si edhe të pastorit Ezra Jin Mingri.
Në një intervistë për Fox News me gazetarin Bret Baier, Trump tha se kërkesën për lirimin e Jimmy Lai ia ka paraqitur Xi Jinping disa herë gjatë takimeve mes tyre.
“I thashë: ‘Do ta vlerësoja nëse do ta lironit. Është në moshë të thyer dhe ndoshta nuk është në gjendje të mirë shëndetësore. Do të ishte një gjest i mirë’”, deklaroi Trump.
Megjithatë, ai pranoi se përgjigjja nga Pekini nuk ka qenë inkurajuese dhe se nuk është optimist për lirimin e Lai. “Nuk u ndjeva optimist, duhet ta pranoj”, u shpreh presidenti amerikan, duke shtuar se çështjen e ka ngritur të paktën dy herë.
Jimmy Lai, 78 vjeç, është dënuar në Hong Kong me 20 vite burg nën akuzat për shkelje të ligjit të sigurisë kombëtare dhe nxitje të kryengritjes. Rasti i tij ka tërhequr vëmendjen e organizatave ndërkombëtare për të drejtat e njeriut dhe liderëve perëndimorë, të cilët e konsiderojnë atë një nga figurat kryesore të lëvizjes pro-demokracisë në Hong Kong.
Sa i përket pastorit Ezra Jin Mingri, Trump u shfaq më optimist për mundësinë e lirimit të tij, megjithëse nuk dha detaje të tjera mbi diskutimet me palën kineze.