Presidenti i Shteteve të Bashkuara, Donald Trump, ka bërë të ditur se administrata e tij nuk do të vendosë tarifën prej 20% për ngarkesat që kalojnë nëpër Ngushticën e Hormuzit, duke ndryshuar kurs vetëm pak më shumë se 24 orë pas shpalljes së planit.
Përmes një postimi në platformën Truth Social, Trump njoftoi se masa e paralajmëruar do të zëvendësohet me marrëveshje investimi dhe bashkëpunimi ekonomik me vendet e Gjirit, pa dhënë detaje të mëtejshme mbi mënyrën e zbatimit të tyre.
Sipas presidentit amerikan, administrata do të përqendrohet në forcimin e partneriteteve ekonomike me shtetet e rajonit, në vend të vendosjes së tarifës që ishte parashikuar të aplikohej për të gjitha ngarkesat që kalojnë në këtë korridor strategjik detar.
Më herët, Trump kishte deklaruar se tarifa 20% synonte të gjeneronte të ardhura për financimin e sigurisë dhe garantimin e lundrimit të lirë në Ngushticën e Hormuzit, një nga rrugët më të rëndësishme për transportin global të naftës.