Ushtria e Ukrainës ka hedhur poshtë pretendimin e Donald Trump, se mijëra trupa të saj janë të rrethuar në rajonin Kursk.
Shtabi i përgjithshëm ukrainas akuzoi Rusinë për fabrikim të raporteve për “manipulim politik dhe për të ushtruar presion mbi Ukrainën dhe partnerët e saj”.
Presidenti amerikan më herët sot i bëri thirrje Vladimir Putinit që t’u kursejë jetën “mijëra trupave ukrainase të cilat janë të rrethuara plotësisht” nga forcat ruse. Pretendimi i tij dukej se bazohej në pohimin e Putinit se trupat e Kievit në Kursk, ku Rusia po fiton me shpejtësi terren, kishin vetëm dy zgjedhje: “Dorëzohuni ose vdisni”.
“Kjo do të ishte një masakër e tmerrshme, e paparë që nga Lufta e Dytë Botërore”, paralajmëroi Trump.
Si përgjigje, Ukraina njoftoi se nuk kishte “asnjë kërcënim për rrethimin e njësive tona” në Kursk, sepse njësitë e saj ishin tërhequr në pozicione “më të favorshme”, gjë që konfirmuan analistët e mbrojtjes.
