Presidenti i Venezuelës, Nicolas Maduro, është paditur zyrtarisht në Distriktin Jugor të Nju Jorkut për një sërë akuzash të rënda që lidhen me trafik droge dhe armësh. Lajmi u bë i ditur nga Prokurorja e Përgjithshme e Shteteve të Bashkuara, Pam Bondi.
Sipas autoriteteve amerikane, Maduro akuzohet për komplot për narkoterrorizëm, komplot për importimin e kokainës në SHBA, si edhe për posedim të mitralozëve dhe mjeteve shkatërruese, së bashku me komplotin për përdorimin e tyre kundër Shteteve të Bashkuara. Në të njëjtën padi përfshihet edhe bashkëshortja e tij, megjithëse detajet mbi akuzat konkrete ndaj saj nuk janë bërë ende publike.
“Ata do të përballen shumë shpejt me të gjithë forcën e drejtësisë amerikane, në territorin amerikan dhe në gjykatat amerikane,” deklaroi Bondi.
Prokurorja e Përgjithshme vlerësoi gjithashtu forcat ushtarake të SHBA-së për atë që e cilësoi si një operacion të jashtëzakonshëm dhe shumë të suksesshëm, i cili çoi në kapjen e dy personave të dyshuar si trafikantë ndërkombëtarë të drogës.
Autoritetet amerikane nuk kanë dhënë ende informacion të detajuar mbi rrethanat e arrestimit apo hapat e mëtejshëm që do të ndiqen në procesin ligjor.