Dronët detarë ukrainas kanë goditur dy cisterna nafte që i përkasin të ashtuquajturës “flotë hije” ruse, teksa ato po lundronin në Detin e Zi, kanë bërë të ditur zyrtarë ukrainas, raporton BBC.
Pamjet tregojnë dronë ujorë që lëvizin me shpejtësi drejt anijeve, përpara se të shpërthejnë në flakë, duke ngritur tym të zi në ajër.
Autoritetet turke identifikuan cisternat e goditura si Kairos dhe Virat, të dyja me flamur të Gambias. Ato u sulmuan të premten pranë brigjeve turke, ndërsa raportohet se Virat është goditur sërish të shtunën. Nuk ka njoftime për viktima.
Sulmet shihen si një përshkallëzim nga Kievi, në përpjekje për të goditur të ardhurat e Rusisë nga nafta, një burim kyç financimi për luftën në Ukrainë. Sipas raportimeve, dy anijet janë pjesë e “flotës hije”, term që i referohet qindra cisternave që Rusia përdor për të anashkaluar sanksionet perëndimore të vendosura pas pushtimit të plotë të Ukrainës në vitin 2022.
Kjo flotë përbëhet kryesisht nga cisterna të vjetra, shpesh me pronësi ose sigurim të paqartë.