Donald Trump ka ndezur tensione të reja ndërkombëtare vetëm pak orë para bisedimeve të së hënës në Uashington me liderët evropianë dhe presidentin ukrainas Volodymyr Zelenskyy. Me tone ultimative, presidenti amerikan deklaroi se Ukraina mund të përfundojë luftën “pothuajse menjëherë”, nëse pranon të heqë dorë nga disa objektiva kyç.
Trump theksoi se Krimea nuk do t’i kthehet më kurrë Ukrainës dhe përjashtoi mundësinë e anëtarësimit të saj në NATO, duke e cilësuar këtë realitet të pandryshueshëm. “Disa gjëra nuk ndryshojnë kurrë,” shkroi ai në Truth Social, duke lënë të kuptohet se Zelenskyy nuk ka zgjidhje tjetër veçse të pranojë kushtet e reja të lojës.
Këto deklarata vijnë pas takimit të tij të diskutueshëm me Vladimir Putinin në Alaskë, i cili u perceptua gjerësisht si një sukses diplomatik për Kremlinin dhe një goditje për reputacionin e SHBA. Trump pretendoi se kishte arritur “përparim të madh” me Rusinë, pa dhënë hollësi konkrete.
Nga ana tjetër, Zelenskyy mbërriti në Uashington duke kërkuar mbështetje të fortë nga SHBA dhe aleatët evropianë për të detyruar Moskën drejt paqes. “Të gjithë duam një përfundim të shpejtë dhe të qëndrueshëm të kësaj lufte,” tha ai, duke nënvizuar rolin jetik të unitetit perëndimor.
Megjithatë, komentet e Trump rrezikojnë të thellojnë hendekun mes SHBA-së dhe Evropës. Liderët evropianë pritet të riafirmojnë të hënën mbështetjen e tyre të palëkundur për integritetin territorial të Ukrainës, duke kundërshtuar çdo plan që do të shpërblente agresionin rus me territore.
Në këtë klimë tensioni, Uashingtoni do të bëhet skena e një beteje diplomatike ku fati i Ukrainës mund të përcaktohet nga kompromiset, presionet dhe kufijtë e rinj të sigurisë që po vizatohen mes Perëndimit dhe Rusisë.