Analisti ushtarak danez Anders Puck Nielsen ka bërë një analizë të detajuar mbi arsyet pse Ukraina po kursen raketat e saj me rreze të gjatë veprimi, duke zbuluar prapa kësaj një strategji të re ushtarake dhe politike për përballjen me Rusinë. Sipas tij, zhvillimi i aftësive për sulme të tilla ka qenë një pikë kthese në luftë, pasi i ka dhënë Kievit mundësinë të ushtrojë presion të drejtpërdrejtë ndaj ekonomisë së luftës së Moskës, përmes goditjeve ndaj rafinerive dhe prodhimit të karburantit. Por tani, sipas Nielsen, Ukraina po hyn në një fazë të re strategjike.

Nga sulmi te parandalimi

Nielsen argumenton se Kievi po e përdor arsenalin e tij si mjet parandalues, jo vetëm për sulm, por si sinjal politik për Rusinë. Në qendër të kësaj strategjie qëndron raketa “Flamingo”, një armë kruiz e prodhimit ukrainas me rreze veprimi deri në 3,000 kilometra dhe një kokë luftarake një ton, e krahasueshme me Tomahawk-un amerikan.

Sipas të dhënave të publikuara, Ukraina prodhon rreth 50 raketa Flamingo në muaj dhe planifikon ta çojë këtë shifër në 200 deri në janar 2026. Megjithatë, përdorimi i kufizuar i tyre tregon se Kievi po i ruan qëllimisht për periudhën e dimrit, kur priten sulme të reja ruse ndaj infrastrukturës energjetike.

“Nëse Kievi mbetet pa drita, do të errësohet Moska”

Presidenti Volodymyr Zelensky ka paralajmëruar se nëse Rusia përsërit sulmet ndaj rrjetit energjetik ukrainas këtë dimër, “Ukraina do t’i fikë dritat në Moskë.”
Sipas Nielsen, kjo shënon kalimin e Ukrainës nga mbrojtja klasike në “parandalim me ndëshkim” — një doktrinë që synon të pengojë armikun përmes kërcënimit të hakmarrjes. “Ky është një moment historik,” thotë ai. “Për herë të parë, Ukraina po e përdor fuqinë e saj jo vetëm për të luftuar, por për të frenuar Rusinë.”

Kjo tregon një ndryshim të perceptimit strategjik, ku Ukraina e sheh veten jo më si viktimë, por si aktor që mund të ndikojë në sjelljen e Kremlinit përmes frikësimit dhe pasojave të parashikueshme.

Arsenali i ruajtur për dimrin

Megjithatë, Nielsen paralajmëron se Vladimir Putin nuk është një lider që frikësohet lehtë. Ai beson se Rusia do të vazhdojë sulmet ndaj infrastrukturës ukrainase, me qëllim që të minojë moralin dhe rezistencën e shoqërisë.
Në këtë kuptim, grumbullimi i raketave Flamingo nga Ukraina ka më shumë një rol strategjik e psikologjik, sesa thjesht ushtarak — për t’i kujtuar Moskës se çdo agresion do të ketë një çmim të lartë.

Ka pasur madje spekulime për blerje të mundshme të raketave Tomahawk amerikane, por Nielsen e konsideron këtë të pamundur në praktikë. Sidoqoftë, vetë ambicia për të krijuar një arsenal parandalues tregon qartë synimin e Ukrainës për të hyrë në një fazë të re të luftës: nga mbijetesa drejt frenimit strategjik.