Mes zhurmës së valëve dhe dronëve që fluturonin mbi horizont, studentët në Gaza Strip po japin provimet universitare në kushte ekstreme, pasi lufta ka shkatërruar pjesën më të madhe të institucioneve arsimore në territor.
Në vijën bregdetare të Gazës, aty ku dikur njerëzit pushonin pranë detit, tani janë vendosur karrige plastike mbi rërë dhe tabela të improvizuara me mbishkrimin “Salla e Provimit: Plazh”. Studentët mbajnë në duar dosje plastike dhe shkruajnë mbi gjunjë, ndërsa përpiqen të përfundojnë provimet mes vapës, erës dhe pasigurisë.
Një prej tyre është Iyadi, student i vitit të katërt për inxhinieri, i cili thotë se para luftës jeta universitare ishte krejt ndryshe. Sot ai përpiqet të zgjidhë ekuacione matematike nën diellin përvëlues, ndërsa pranë tij dëgjohen valët e detit, të qarat e fëmijëve në kampet e improvizuara dhe zhurma e dronëve në qiell.
Pedagogu Hamidi, i cili ka humbur shtëpinë dhe universitetin ku jepte mësim, shpërndan fletët e provimit mbi rërë dhe u kujton studentëve të shkruajnë emrat me kujdes që “të drejtat e tyre të mos humbasin në kaos”.
Sipas autoriteteve palestineze, shumë universitete në Gaza janë shkatërruar plotësisht ose pjesërisht gjatë luftës, duke detyruar studentët dhe pedagogët të zhvillojnë mësimin dhe provimet në ambiente të improvizuara.
Ministria Palestineze e Arsimit të Lartë e ka cilësuar situatën si “gjenocid arsimor”, duke deklaruar se mbi 20 mijë studentë dhe mijëra mësues e pedagogë kanë humbur jetën që nga nisja e konfliktit.
Nga ana tjetër, ushtria izraelite ka deklaruar se disa universitete janë përdorur nga Hamas për qëllime ushtarake, pretendim që ka shtuar edhe më shumë debatet ndërkombëtare mbi shkatërrimin e infrastrukturës arsimore në Gaza.
Pavarësisht kushteve të vështira, shumë studentë vazhdojnë të ndjekin studimet me shpresën se një ditë do të ndihmojnë në rindërtimin e qyteteve dhe jetës së shkatërruar nga lufta.