Mes nëntë viktimave të aksidentit tragjik me avionin privat Learjet 60 në Florida është identifikuar edhe 20-vjeçarja Nathalia Gadelha Filgueiras, e cila ishte pjesë e ekuipazhit si bashkëpilote. Lajmi për identitetin e saj u konfirmua nga familjarët për gazetën amerikane “New York Post”.
Historia e Nathalias ka prekur opinionin publik, pasi e reja kishte arritur të merrte licencën e pilotit në një moshë shumë të hershme, vetëm 17 vjeçe, ndërsa ishte ende nxënëse në shkollën e mesme. Në vitin 2023, ajo u bë pjesë e mediave lokale për këtë arritje të rrallë, pasi kishte mësuar të drejtonte avionë përpara se të merrte patentën e makinës.
E apasionuar pas aviacionit që në fëmijëri, Nathalia kishte nisur trajnimet për fluturim në vitin 2020. Në këtë rrugëtim ishte mbështetur edhe nga babai i saj, i cili ndante të njëjtin pasion për pilotimin. Formimi i saj ishte realizuar përmes Akademisë së Aviacionit të Distriktit Shkollor të Palm Beach County, e cila kishte financuar marrjen e licencës private.
Pavarësisht moshës së re, 20-vjeçarja kishte fituar rreth 1,300 orë përvojë në fluturim dhe prej nëntë muajsh punonte si pilote profesioniste. Ajo synonte të ndërtonte një karrierë në linjat ajrore komerciale.
Vetëm dhjetë minuta para rrëzimit, Nathalia i kishte dërguar një mesazh partnerit të saj, ku i tregonte se avioni po përballej me turbulenca dhe ngritje gjatë fluturimit. Nëna e saj, Camila, ka rrëfyer se ndihej krenare për vajzën që po ndiqte ëndrrën e saj, por njëkohësisht kishte pasur gjithmonë frikën se pasioni për aviacionin mund t’i merrte jetën.
Aksidenti ndodhi të dielën në Palm Beach County, ku avioni me nëntë persona në bord u rrëzua në një zonë të banuar. Fatkeqësisht, asnjë prej personave që ndodheshin në avion nuk arriti të mbijetonte.