Donald Trump nuk është përmbajtur duke shpërthyer në ofendime ndaj një gazetareje, gjatë një konference për mediat në Shtëpinë e Bardhë.
Incidenti ndodhi gjatë një konference për shtyp në lidhje vrasjen e dy anëtarëve të Gardës Kombëtare nga dy shtetas afganë në Uashington. Gazetarja Nancy Cordes nga “CBS Neës” pyeti Trump për faktin se autori kishte patur bashkëpunim të ngushtë me CIA-n në të shkuarën.
Pas kësaj, presidenti reagoi duke thënë se autori i dyshuar i krimit u çmend, teksa vijoi duke sulmuar administratën e paraardhësit të tij Joe Biden që i lejoi afganët të hynin në SHBA.
Në këtë moment gazetarja ndërhyri sërish dhe tha: “Inspektori juaj i Përgjithshëm i Departamentit të Drejtësisë të Shteteve të Bashkuara sapo raportoi këtë vit se DHS dhe FBI-ja kishin kryer një verifikim të plotë të këtyre afganëve që u sollën në SHBA, kështu që pse e fajësoni administratën Biden për atë që bëri ky njeri?”
Ky koment e acaroi Trump dhe përgjigja e tij ishte një sulm i ashpër personal.
“Sepse ata i lanë të hynin. A je idiote? Sepse ata erdhën me aeroplan së bashku me mijëra njerëz të tjerë që nuk duhet të ishin këtu dhe ti po bën pyetje sepse je një person idiot.”
Pavarësisht sulmeve verbale, gazetarja dukej se e pranoi fyerjen me qetësi, megjithëse në një moment ngriti një vetull dhe pohoi me kokë ndërsa Trump vazhdoi ta qortonte, duke injoruar informacionin që ajo po përpiqej të sqaronte.