Palestina është përfshirë nga përplasje të dhunshmë mes besimtarëve myslymanë dhe atyre hebrenj, për shkak të festave përkatëse fetare, të cilat këtë vit janë në të njëjtën periudhë.

Forcat izraelite bastisën Xhaminë Al-Aksa në qytetin e vjetër të Jeruzalemit mëngjesin e sotëm dhe sulmuan besimtarët palestinezë, duke ngritur frikën e tensioneve më të gjera, pasi festat islamike dhe hebraike mbivendosen.

Tensioni ka qenë tashmë i lartë në Jerusalemin lindor dhe Bregun Perëndimor prej muajsh, dhe frika për dhunë të mëtejshme u ushqye me konvergjencën e muajit të agjërimit të shenjtë mysliman dhe Pashkës.

Konfrontime të tilla në kompleksin e shenjtë të kontestuar, faltorja e tretë më e shenjtë në Islam që është gjithashtu vendi më i shenjtë në judaizëm i referuar si Mali i Tempullit, kanë ndezur luftëra vdekjeprurëse ndërkufitare midis Izraelit dhe sundimtarëve të Hamasit të Gazës prej vitesh.

Videot e shpërndara në mediat sociale tregojnë oficerët e policisë izraelite duke rrahur palestinezët me shkopinj. Agjencia zyrtare palestineze e lajmeve, Wafa, raportoi se dhjetëra besimtarë, të cilët kalojnë gjithë natën në Ramazan duke u falur, u plagosën kur policia bastisi xhaminë.

Fillimisht nuk ishte e qartë se çfarë e shkaktoi dhunën. Policia izraelite tha se përdori forcën për të evakuuar besimtarët që ishin ngujuar në xhami me fishekzjarre, gurë dhe shkopinj. Ata shtuan se një oficer u plagos në këmbë nga një gur dhe se dhjetëra ‘rebelë’ u arrestuan.