Një video prekëse e regjistruar gjatë tërmeteve të fuqishme që goditën Venezuelën po bën xhiron e rrjetit dhe ka emocionuar mijëra njerëz.

Në pamjet e shpërndara në rrjetet sociale shihet një burrë i moshuar, i cili në momentet e panikut mban fort dorën e partneres së tij, teksa lëkundjet e forta të tërmetit trondisin banesën ku ndodheshin.

Gruaja duket se ka vështirësi në lëvizje, ndërsa i moshuari qëndron pranë saj gjatë gjithë kohës, duke u përpjekur ta qetësojë dhe ta mbrojë mes frikës dhe pasigurisë.

Skena është cilësuar nga shumë qytetarë dhe përdorues të rrjeteve sociale si një simbol i dashurisë, besnikërisë dhe përkushtimit në momentet më të vështira.

Pamjet janë shpërndarë gjerësisht në internet, duke prekur zemrat e mijëra njerëzve në mbarë botën.