Në Britaninë e Madhe po rritet shqetësimi për një valë lirimesh aksidentale të të burgosurve, që sipas mediave ka marrë përmasa alarmante. Daily Mail raporton se që nga momenti kur Keir Starmer mori pushtetin, rreth 302 të dënuar janë lënë të lirë gabimisht — mes tyre autorë krimesh të dhunshme, agresorë seksualë, hajdutë dhe mashtrues.
Sekretari britanik i Drejtësisë, David Lammy, pranoi se vetëm muajin e kaluar 12 të dënuar u liruan pa dashje dhe se dy prej tyre vijojnë të jenë në arrati.
Nga ana tjetër, Robert Jenrick, që në qeverinë hije të opozitës mban rolin e sekretarit të drejtësisë, e cilësoi situatën si “kaos total”, duke akuzuar qeverinë për humbje kontrolli mbi sistemin penitenciar.
Njëri nga institucionet më problematike rezulton të jetë HMP Pentonville, një burg i kategorisë B në veri të Londrës, i cili raportohet se ka liruar gabimisht shtatë të burgosur që nga fitorja e laburistëve në korrikun e kaluar. Sipas të dhënave që mbulojnë deri në mars 2025, numri real i lirimeve aksidentale në këtë burg mund të ketë arritur deri në 16 persona.
Rasti më i rëndë që ka tronditur opinionin britanik është ai i Hadush Kebatu, një shtetas etiopian i dënuar për sulm seksual ndaj një vajze 14-vjeçare dhe një gruaje, i cili u lirua gabimisht më 24 tetor, në vend që të dërgohej në një qendër paraburgimi për emigracionin.