Një grua 71-vjeçare ka ngritur padi ndaj një mjeku 91-vjeçar, duke e akuzuar se gjatë një procedure inseminimi artificial në vitin 1982 ka përdorur spermën e tij për ngjizjen e djalit të saj, pa dijeninë dhe pëlqimin e saj.
Mary Ellen Lukezick kishte besuar për më shumë se katër dekada se djali i saj ishte ngjizur me spermën e një dhuruesi, i cili në atë kohë i ishte përshkruar si një student i ri dhe i shëndetshëm i mjekësisë.
Dyshimet nisën në dhjetor të vitit 2024, kur Joseph Laedtka Heider, sot 43 vjeç, kreu një test ADN-je për prejardhjen në Ancestry.com. Rezultatet treguan lidhje gjenetike me familjen e mjekut Frederick Dettmann dhe, sipas padisë, zbuluan se ai ishte babai biologjik i Josephit.
Testi i ADN-së zbuloi gjithashtu nëntë gjysmë-vëllezër të tjerë, duke ngritur dyshime se rasti mund të mos jetë i izoluar.
Sipas padisë, Lukezick ishte paciente e Dettmann në vitin 1982 dhe, pasi kishte hasur vështirësi për të pasur fëmijë, mjeku i kishte rekomanduar inseminimin artificial.
Padia është depozituar më 6 gusht. Avokatët e nënë e bir kanë deklaruar se gjatë përgatitjes së çështjes janë kontaktuar edhe gra të tjera që pretendojnë se kanë pasur përvoja shqetësuese me mjekun, disa prej të cilave datojnë që nga vitet 1970.
Dettmann, i cili tashmë është në pension, i mohon akuzat përmes avokatëve të tij.
Rasti ka rikthyer në vëmendje edhe një incident të vitit 1985, kur Dettmann ishte akuzuar për sjellje të papërshtatshme gjatë një ekzaminimi gjinekologjik. Në atë kohë nuk u ngritën akuza, pasi autoritetet e konsideruan të vështirë provimin e pretendimit.
Tashmë, procesi gjyqësor pritet të hedhë më shumë dritë mbi mënyrën se si është kryer procedura e inseminimit në vitin 1982 dhe nëse ka pasur raste të tjera të ngjashme.