Detaje të reja janë zbuluar pas arrestimit në Dubai të Daniel Kinahan, një nga figurat më të njohura të krimit të organizuar në Evropë, ndërsa autoritetet ushtrojnë presion të madh mbi familjen e tij për sekuestrimin e pasurive me vlerë të konsiderueshme.
Sipas një investigimi të “Daily Mail”, bashkëshortja e Kinahan, Caoimhe Robinson, jeton në një vilë luksoze me pesë dhoma gjumi me vlerë rreth 5 milionë paund, në një komunitet të rrethuar në periferi të Dubait. Ajo dyshohet se po përpiqet të ruajë pasuritë e familjes, duke shitur prona dhe duke transferuar asete përpara se ato të konfiskohen.
Raporti thekson se Robinson, nënë e katër fëmijëve, nuk përballet me akuza penale dhe duket si një “nënë e zakonshme” për banorët lokalë. Megjithatë, pas kësaj fasade, ajo menaxhon një rrjet të gjerë pronash që besohet se lidhet me aktivitetet e kartelit Kinahan.
Autoritetet e Dubait kanë sekuestruar deri tani asete me vlerë rreth 168 milionë paund dhe synojnë të konfiskojnë pronat që kapin mbi 1 miliard paund. Shumica e këtyre pasurive janë regjistruar në emër të Robinson, një strategji e supozuar për të mbrojtur asetet nga hetimet ndërkombëtare.
Familja Kinahan kishte ndërtuar një rrjet biznesesh dhe pronash në Emiratet e Bashkuara që nga largimi nga Evropa në vitin 2016, pas konflikteve me bandën rivale Hutch në Irlandë. Dubai konsiderohej më parë si strehë e sigurt, por situata ka ndryshuar për shkak të presionit ndërkombëtar dhe sanksioneve amerikane, që përfshijnë shpërblime prej 5 milionë dollarësh për informacion mbi drejtuesit e kartelit.
Daniel Kinahan ndodhet aktualisht në paraburgim në burgun Al Awir dhe pret procedurat e ekstradimit drejt Irlandës, ku ai akuzohet për përfshirje në krim të organizuar. Arrestimi i tij konsiderohet një nga goditjet më të mëdha ndaj krimit të organizuar në Evropë në vitet e fundit, ndërsa autoritetet vijojnë përpjekjet për të çmontuar rrjetin dhe për të konfiskuar pasuritë e krijuara ndër vite.