Aktorja Dalyce Curry, e njohur për rolet e saj në “The Blues Brothers”, “The Ten Commandments” dhe “Lady Sings the Blues”, është quajtur një nga viktimat fatale të zjarreve shkatërruese të Los Angelesit. Ajo ishte 95-vjeçare. Eshtrat e Curry u zbuluan në pronën e saj në Altadena, e cila u shkatërrua nga zjarri Eaton javën e kaluar. Stërmbesa e saj, Dalyce Kelley, konfirmoi lajmin tragjik përmes Facebook, duke shkruar: “Rreth një orë më parë mjekja konfirmoi se eshtrat e saj ishin gjetur në pronë”.
Kelley e kishte lënë atë në shtëpi të martën vonë në mbrëmje, pa e ditur për katastrofën. Deri të mërkurën në mëngjes, zjarri i Eaton kishte përpirë lagjen e Curry-t. Kelley nxitoi në vendngjarje, por u ndalua në një barrikadë policie dhe u informua se shtëpia ishte shkatërruar plotësisht. Ajo më pas postoi pamjet e mbetjeve të djegura të shtëpisë së Curry-t. Aktorja është në mesin e 12 viktimave të identifikuara publikisht, një listë që përfshin ish-aktorin australian Rory Sykes.
