Një tragjedi e rëndë ka tronditur Zvicrën pas një zjarri vdekjeprurës në një klub nate gjatë festimeve të Vitit të Ri, ku sipas hetuesve dyshohet për neglizhencë të rëndë nga drejtuesit e lokalit.
Ngjarja ndodhi në barin Le Constellation, në resortin alpin Crans-Montana, duke shkaktuar vdekjen e 41 personave dhe plagosjen e mbi 100 të tjerëve. Sipas hetimeve paraprake, zjarri shpërtheu pasi stafi përdori shishe shampanje të pajisura me fishekzjarre pranë tavanit, duke shkaktuar një përhapje të menjëhershme të flakëve.
Prokurorët zviceranë kanë analizuar pamjet e kamerave të sigurisë, të cilat, sipas avokatëve të viktimave, tregojnë se një nga pronaret, Jessica Moretti, është larguar nga ambientet sapo ka vënë re zjarrin, pa paralajmëruar klientët apo stafin për rrezikun.
Avokati Fabrizio Ventimiglia, që përfaqëson një të mbijetuar, e ka cilësuar këtë sjellje si të papranueshme, duke theksuar se ekzistonte një detyrim moral dhe ligjor për të ndihmuar dhe për të parandaluar hyrjen e personave të tjerë në lokal.
Nga ana e saj, Moretti ka deklaruar se reagoi në panik dhe doli për të njoftuar zjarrfikësit, me synimin për t’u kthyer më pas. Megjithatë, hetimet sugjerojnë se mungesa e koordinimit dhe përgatitjes për emergjenca ka përkeqësuar ndjeshëm pasojat.
Pamjet thuhet se tregojnë gjithashtu se stafi kishte vështirësi në gjetjen e fikëseve të zjarrit, ndërsa flakët u përhapën me shpejtësi për shkak të materialeve të ndezshme në tavan.
Jessica Moretti dhe bashkëshorti i saj janë aktualisht nën hetim dhe përballen me akuza për vrasje nga pakujdesia, plagosje dhe zjarrvënie nga pakujdesia. Nëse shpallen fajtorë, ata rrezikojnë deri në 20 vite burg.
Autoritetet po vijojnë hetimet për të zbardhur plotësisht rrethanat e kësaj ngjarjeje tragjike që ka tronditur opinionin publik.