Këshilli i Ministrave ka miratuar fondin prej 840,702,155.51 lekësh për kompensimin financiar të pronarëve, pasuritë e të cilëve janë prekur nga ndërtimet e legalizuara. Sipas Agjencisë Shtetërore të Kadastrës, me vendimin e ri do të trajtohen 328 prona, ndërsa në procesin e kompensimit përfshihet një sipërfaqe totale prej 61,477.13 metrash katrorë truall.
Paralelisht, 1901 banorë përfitojnë mundësinë për t’u pajisur me parcelën ndërtimore, në kuadër të vijimit të procesit të legalizimeve.
Pas publikimit të vendimit në Fletoren Zyrtare, lista e përfituesve do të publikohet edhe në platformën online “Përfituesit e parcelës ndërtimore & Subjektet që kompensohen” në faqen zyrtare të ASHK-së. Përmes saj, qytetarët mund të verifikojnë nëse janë pjesë e listës së përfituesve, si për parcelën ndërtimore, ashtu edhe për kompensimin financiar.
Sipas ASHK-së, vendimi është pjesë e procesit të vazhdueshëm për zgjidhjen e problematikave të krijuara nga ndërtimet pa leje dhe legalizimet, duke synuar trajtimin e të drejtave të pronarëve të truallit, njëkohësisht me përmbylljen graduale të proceseve të legalizimit.
Kompensimi financiar për këtë kategori është parashikuar edhe në vendime të mëparshme të Këshillit të Ministrave. Në qershor 2026 u miratua një fond prej rreth 870.7 milionë lekësh, me 422 prona të trajtuara për kompensim.
Me vendimin e ri, procesi vijon me një tjetër paketë pronash dhe përfituesish, duke synuar përmbylljen graduale të proceseve kalimtare të pronësisë dhe forcimin e sigurisë juridike mbi pronën.