Nga 1 janari 2026, paga minimale në Shqipëri do të rritet nga 40 mijë në 50 mijë lekë, ose rreth 500 euro, duke përmbushur një nga premtimet kryesore elektorale të qeverisë socialiste në zgjedhjet e 11 majit.
Qeveria ka garantuar se për 18 muajt e parë do të mbulojë vetë kostot shtesë të sigurimeve shoqërore dhe shëndetësore që vijnë si pasojë e rritjes së pagës minimale, në mënyrë që as punëdhënësit e as punëmarrësit të mos rëndohen financiarisht. Pas kësaj periudhe, përgjegjësia i kalon plotësisht bizneseve, çka ka ngjallur shqetësim për rritje të kostove të operimit dhe rrezikun e shtimit të informalitetit.
“Rritja e pagës minimale është një hap i rëndësishëm social që prek direkt shtresat më të brishta të tregut të punës, por duhet të shoqërohet me politika mbështetëse për biznesin e vogël”, u shpreh Erion Muça, ekspert i tregut të punës.
Nga ana tjetër, Zef Preçi, analist i ekonomisë, e cilëson këtë masë si më shumë një veprim propagandistik sesa një politikë zhvillimi: “Pa analiza të plota mbi produktivitetin dhe kostot e biznesit, rritja e pagës minimale mund të sjellë pasoja negative, përfshirë mbylljen e vendeve të punës dhe rritjen e punësimit informal”.
Edhe sipërmarrësit shprehin shqetësime. Florian Zekja, pronar në sektorin e manifakturës, theksoi se pas mbarimit të periudhës së subvencionimit, kompanitë do të përballen me presion të lartë financiar dhe do të detyrohen të rishikojnë strategjitë e tyre të punësimit dhe investimit.
Aktualisht, Shqipëria mbetet ndër vendet me pagën minimale më të ulët në rajon, duke lënë pas vetëm Kosovën. Në krye të renditjes qëndron Mali i Zi me 670 euro, i ndjekur nga Serbia me 618 euro, ndërsa Maqedonia e Veriut dhe Bosnje-Hercegovina pozicionohen në mes.