Deputeti i Kuvendit të Kosovës, Adem Hoxha, është sulmuar fizikisht të premten gjatë një tubimi në fshatin Zlipotok të komunës së Dragashit. Sulmi ka ndodhur rreth orës 18:30 dhe, përveç Hoxhës, kanë pësuar edhe bashkëshortja e tij dhe vajza 14-vjeçare.
Sipas Policisë së Kosovës, deputeti fillimisht është paraqitur në Qendrën e Mjekësisë Familjare në Dragash për ndihmë mjekësore, ndërsa më pas është transferuar në Spitalin Rajonal të Prizrenit. Sipas raportit të mjekut, Hoxha ka pësuar lëndime të lehta trupore.
Autoritetet kanë bërë të ditur se personi i dyshuar për sulmin është ndaluar dhe është vendosur në paraburgim për 48 orë. “Në koordinim me prokurorin kujdestar, është iniciuar rasti ‘Lëndim i lehtë trupor’, ndërsa i dyshuari është ndaluar me vendim të prokurorit për 48 orë”, thuhet në njoftimin zyrtar.
Adem Hoxha përfaqëson komunitetin goran në Kuvendin e Kosovës dhe ky incident ka shkaktuar shqetësim në opinionin publik, veçanërisht për faktin se janë përfshirë edhe anëtarë të familjes së tij në sulm. Autoritetet nuk kanë dhënë ende informacione mbi motivin e ngjarjes, ndërsa hetimet janë në vazhdim.