Partia Demokratike ka reaguar sërish sot në lidhje me akuzat ndaj kreut të Kuvendit, duke këmbëngulur se Ilir Meta ka marrë ryshfet dhe se emri i tij figuron në transferuat bankare të kompanisë “DIA” që ka marrë para nga mbledhja e borxheve të CEZ shpërndarjes.
Deputetja e PD-së, Jorida Tabaku, ka deklaruar se ngjarja është shumë e rëndë dhe se këtë çështje duhet ta hetojë Prokurori i Përgjithshëm Adriatik Llalla.
“Në dokumentet të publikuara në shtyp, është e qartë se “DIA” ka marrë miliona euro ryshfet nga CEZ dhe se i përfshirë është edhe Ilir Meta. Ekzistojnë fakte që kryeparlamentari ka lidhje me këtë kompani. Reagimi i thatë i Ramës një ditë më parë e thellon skandalin për kreun e Kuvendit Meta, – u shpreh tabaku. – Ngjarja është shumë e rëndë dhe mund të arrihet të hetohet vetëm nga Prokurori i Përgjithshëm, por kjo bëhet vetëm kur Ilir Meta të japë dorëheqjen dhe të hetohet si qytetar i thjeshtë para drejtësisë”.
Deklarata e plotë
“Skandali i rryshfetit të Ilir Metës u thellua dhe mori më shumë erë nga përpjekja e Edi Ramës për ta mbuluar, edhe pse reagimi i Kryeministrit është i thatë, sa për të larë gojën.
Me anë të zyrës së tij, Edi Rama u mundua të komunikonte se avokatët e qeverisë në zyrën e arbitrazhit në Vjenë nuk paskan përmendur emrin e Ilir Metës si përfitues të rryshfeteve në shuma të mëdha.
Po çfarë kanë deklaruar zyrtarisht në fakt, të zezë mbi të bardhë Oliver Seyd dhe Tim Schreiber, avokatët e qeverisë shqiptare në dokumentin zyrtar drejtuar Arbitrazhit të Vjenës me datë 30 qershor 2015: Ata janë shprehur si më poshtë:
DIA ka marrë miliona euro nga CEZ në atë kohë, dhe i ka justifikuar këto shuma për rryshfete për zyrtarë të lartë, përfshirë një ish-kryeministër i cili ka qenë nën akuzë më parë për korrupsion.
Agjensia ndërkombëtare e lajmeve BIRN që botoi këtë skandal ka arritur në konkluzionin se ish-kryeministri që përmendin avokatët e qeverisë, i cili ka qenë nën akuzë më parë për korrupsion, është Ilir Meta.
I gjithë hetimi bazuar edhe në deklaratat e mëparshme të CEZ para autoriteteve shqiptare, con ashtu sic e kanë pranuar zyrtarisht avokatët e qeverisë shqiptare, tek Ilir Meta.
BIRN flet edhe për rrethana të tjera, që e lidhin Ilir Metën me DIA-n, si përshembull vajtjen e tij deri në Pragë në zyrat qendrore të CEZ për të lobuar që DIA, kompania që ka shpërndarë rryshfete, të kontraktohej për mbledhjen e borxheve dhe shërbime të tjera.
Dokumente të siguruara nga BIRN, dhe të publikuara në një shkrim të datës 3 qershor 2015, tregojnë se ish drejtori I përgjithshëm i CEZ Shpërndarje, Josef Hajsek ka konfirmuar se Kastriot Ismailaj u rekomandua nga Ilir Meta, i cili u ofrua si garant i marrëveshjes.
Këto janë faktet, kjo është e vërteta. Të tjerat janë përpjekje të dëshpëruara për të mbuluar këtë skandal. Ngjarja është e rëndë dhe kërkon hetim të menjëhershëm e serioz nga Prokurori i Përgjithshëm.
Por kjo mund të arrihet vetëm pas dorëheqjes së Ilir Metës nga posti i numrit dy të vendit, dhe dorëzimin e tij para drejtësisë si qytetar i thjeshtë”.
4 shtator 2015 (gazeta-Shqip.com)