Kryeministri Edi Rama ka shprehur mirënjohjen e tij për shumën rekord që u mblodh për Shqipërinë në Konferencën e Donatorëve.
Rama falenderoi të gjithë donatorët, duke cituar Biblën dhe Kuranin. Sipas kryeministrit, shuma prej 1.15 miliardë eurove tejkalon çdo pritshmëri të tij.
“Kjo është përtej imagjinatës së shfrenuar, nuk di ç’të them. Më lejoni të jem mistik se në ç’mënyrë tjetër mund të shpjegoj gjithë këtë.
Më lejoni të citoj diçka nga bibla, Korinthën, ku thuhet: ‘sepse në një frymë u pagëzuam në një trup dhe të gjithë vijmë nga e njëjta frymë dhe shpirt, nëse një pjesëtar nderohet të gjithë gëzojmë së bashku’. Unë jam i nderuar shpresoj që të gjithë të gëzojmë të gjithë bashkë për Shqipërinë.
Ndërsa citoj biblën, udhëheq një vend që e ka vëllazërinë fetare siç edhe Papa Françesku e ka pagëzuar nuk mund të largohem pa e përmbyllur me kuranin, dhe nuk gjej dot shembull më të bukur se ajo që ndodhi sot: ‘Njerëzimi është një komb i vetëm, faleminderit shumë”, tha Rama.