Dy persona të armatosur kanë grabitur kamerierin e një lokali në qytetin e Krujës. Mësohet, se nën kërcënimin e armës së zjarrit, ata kanë arritur të marrin xhiron ditore prej 20000 lekësh.
Bazuar në prova të grumbulluara, shërbimet e Komisariat të Policisë Krujë, organizuan dhe finalizuan operacionin policor të koduar "Cudhi", në kuadër të të cilit u bë kapja dhe arrestimi në flagrancë i shtetasit:
A.K., 24 vjeç, banues në fshatin Kroj Madh të Njësisë Administrative Cudhi, Krujë. Si dhe u shpall në kërkim policor bashkautori tjetër i ngjarjes, për të cilin nuk i bëjmë me dije të dhënat për arsye hetimore.
Gjatë operacionit, në momentin që shërbimet e Policisë kanë rrethuar banesën për të ushtruar kontroll, shtetasi A. K. ka dalë nga banesa me dy armë zjarri pistoleta në brez, por është neutralizuar dhe arrestuar nga forcat e policisë. Në cilësinë e provës materiale u sekuestruan dy armët e zjarrit pistoleta me dy krehra me fishekë.
Materialet do t’i kalojnë Prokurorisë pranë Gjykatës së Shkallës së Parë Krujë, për kryerjen e veprave penale "Vjedhja me dhunë", kryer në bashkëpunim dhe "Mbajtja pa leje e armëve dhe municionit luftarak".