Partia Demokratike ka denoncuar një rast të dhunës në Kavajë, ku sipas saj është rahur një qytetar i cili kishte shkuar të ankohej në zyrat e OSHE së këtij qyteti. Në një deklaratë për shtyp, koordinatori i PD, Ivi Kaso deklaroi se vëllai i kreut të Bashkisë, Elvis Rroshi e ka qëlluar me grushte qytetarin, “me bekimin e Edi Ramës, i cili vazhdon ta mbajë në pushtet këtë bandë që vijon të sundojë në Kavajë”.
Deklarata e plotë
“Edi Rama vazhdon ta mbajë të vërsulur ndaj qytetarëve bandën kriminale të Elvis Rroshit në Kavajë, i cili është ende kryetar bashkie, edhe pse u zbulua dënimi i tij në Itali për përdhunim.
Dje banda e Rroshit ka sulmuar sërish një qytetar, i cili një muaj më parë denoncoi dhunën shtazarake që ushtroi ndaj tij, vëllai i Rroshit, drejtor i Ramës për OSHE-në në Kavajë, në ambientet e institucionit ku qytetari Julian Kola, kishte shkuar për t’u ankuar mbi një faturim të padrejtë.
Dje, e njëjta bandë, ka dhunuar sërish këtë qytetar, i cili denoncon publikisht se ushtari i Rroshit e ka goditur edhe brenda furgonit të policisë, dhe më keq, edhe në komisariat, ku njerëz me uniformën e shtetit, e kanë kërcënuar që të tërhiqet, të mos bëjë kallëzim.
Pak javë më parë, kjo bandë e Rroshit, e armatosur, plagosi në mes të ditës qytetarë të pafajshëm dhe kreun e forumit rinor të Partisë Demokratike.
Me gjithë këto precedentë, e këtë dhunë ndaj qytetarëve, me gjithë këto akte skandaloze që tregojnë se kjo bandë është mbi ligjin, që ka në shërbim të saj policinë e gjithë zyrat e shtetit, sërish Edi Rama vazhdon ta mbajë e ti japë pushtet kreut të këtyre banditëve, Elvis Rroshi.
Edhe pse e quajti botërisht të mbaruar shërbimin e Rroshit, kur u zbulua dënimi i tij në Itali për përdhunim, Rama në fakt po lejon, e po përkrah të gjithë shërbimet kriminale të kësaj bande që sundon në Kavajë.
Kush është motivi që e bën Ramën të mos ndahet dot nga këta kriminelë e nga kjo bandë e armatosur, me të cilët ndan pushtetin?
A janë tenderat disa milionë euroshe që duhet të firmosë Elvis Rroshi, si ai i përroit të Leshniqës, para që oligarkia i ndan mes vedi?
Apo është projekti fantazëm i portit të Karpenit, ku pasuria kombëtare i jepet një firme të sajuar me 100 paund pasuri, e cila më pas e tregton sipas qejfit këtë aset të rëndësishëm të vendit?
Çfarë po pret Edi Rama të shkarkojë nga detyra banditin e tij Rroshi?
Përgjigja është e thjeshtë; po pret shërbimet e fundit kriminale, ndarjen e parave dhe të pasurive kombëtare, dhe për këtë i duhet edhe ca kohë firma e banditit Rroshi”.
27 korrik 2016 (gazeta-Shqip.com)