Dosja
Bijo, Kasajt: Nesër ke “bubuzhelët”. Një pronare na pagoi mirë!
Inspektorët e tatimeve dhe të agjencisë kundër lojërave të fatit janë fundosur nga bisedat që kanë kryer në telefon mes njëri-tjetrit apo edhe me administratorët e disa lokaleve me baste sportive. Ata i njoftonin për çdo kontroll që kryenin, si dhe të merrnin masa. Madje, pagesat kryheshin njëherë në muaj. Akuza thotë se Kreshnik Kasaj bashkë me sekserin tjetër Petrit Ahmetaj, çdo mesmuaji i dorëzonin përgjegjësit të grupit të tatimorëve, Metjon Bijos, kuotën e pagesës për mbrojtjen e bizneseve që ai menaxhonte.
Përgjimi 1
Në një nga përgjimet e regjistruara, edhe pse Metjon Bijo ishte punonjës i administratës shtetërore, e quante Kreshnik Kasajn si shteti dhe e njoftonte për kontrollet që do të bënin tatimorët duke i quajtur me emrin e koduar “bubuzhelët”.
Metjoni: O shtet!
Kasaj: Ça je tu bo?
Metjoni: Si je?
Kasaj: Mirë, ti ça ke bo?
Metjoni: Mirë. Nga nesër fillojnë dalin ‘bubuzhelët’ në rrugë e thashë të të njoftoj që ta dish. Por flasim që të them se ku do të jenë konkretisht, sepse janë tri grupe.
Kasaj: Ok. Hajde takohemi pasdite e pimë kafe.
Përgjimi 2
Prokuroria ka regjistruar edhe një bisedë mes Metjon Bijos dhe një personi tjetër më datë 14 dhjetor 2014, ku e njofton se pronarja e një biznesi pagoi në formë ryshfeti një shumë të mirë dhe mbetën të kënaqur.
077: Erdhi ky pronari i Blertës me një mikun tim, këtu tani.
855: Ok. Edhe!?
077: Është shumë ok. Jo ok. Po shumë ok. Uuah nuk e prisja!
855: Aaa. Mirë mirë. Bravo çiao e folim.
Gjatë bisedave të përgjuara Bijo në një rast i shkruan një personi me emrin Denis, i cili rezulton debitor 8 milionë lekë dhe tatimorët duan t’i mbyllin biznesin. Ai i thotë të bëjë gati lekët që mos t’i mbyllin aktivitetin.
077: Do të kalojnë grupet për të mbyll. Ça do bësh?
023: Do takohemi pasdite si thua?
077: Takohemi, po ec i përgatitur se asaj i duhet bo diçka se nuk është pak mos t’i marrë lekët, me t’i qëndis letrat. Bëj kafen kësaj e mbaro punë.
Përgjimi 3
Në një bisedë mes Jani Berukasit dhe një personi me emrin Pal, inspektori i lojërave të fatit porosit që të kujdeset për një person nga Gramshi që është me LSI-në.
055: Ore të ka ardhur një nga Gramshi, një i LSI aty. Po ndihmoi mo të marrsha të ligat ndihmoi.
022: Po jam t’u e ndihmuar, se u bë Gramshi, Skrapari e Tropoja u bote?
055: Tropoja jo, Tropojës jo të kam thënë unë.
022: Vallahi Tropoja një, Skrapari e Gramshi janë bo ore ti, janë bo tani.
051: LSI–në, LSI-në ndihmoje.