Deputeti i Partisë Demokratike, njëkohësisht nënkryetar i komisionit të posaçëm për reformën në drejtësi, Eduard Halimi në një deklaratë të shpërndarë për mediat akuzoi kryeministrin Edi Rama se ka urdhëruar deputetët e tij që të mos pranojnë konsensus me opozitën lidhur me draftin për reformën në drejtësi. Sipas Halimit, PD do i dërgojë Venecias qëndrimin e saj lidhur me draftin e hartuar nga ekspertët për të treguar se opozita është për një reformë sipas standardeve evropiane që shmang kapjen politike të sistemit.
“Edi Rama urdhëroi sot deputetët e tij të mos pranojnë kërkesën e opozitës për hartimin e një drafti të vetëm konsensual sipas Komisionit të Venecias për Reformën në Drejtësi, që të shkonim bashkë bazuar në një konsensus sipas Venecias, dhe jo të ndarë.
Sot ishte dita kur palët politike hoqen maskat, kush ishte për Venecian dhe kush ishte kundër Venecias. Kush ishte për një konsensus sipas Venecias dhe kush ishte për kapje politike të drejtësisë me mazhorancën e pazareve.
Vendimi i sotëm i Ramës që dërgoi një draft të vetin, jo transparent, të pakonsultuar me askënd, të hartuar me urdhër politik, që injoron me arrogancë rekomandimet e Venecias, ishte dëshmi e vullnetit të keq për t’i ikur Venecias, për t’i ikur konsesusit sipas standardeve të Venecias.
Opozita tregoi edhe njëherë sot në komision, vullnetin e mirë për një reforme konsensuale bazuar në rekomandimet e Venecias, një reforme që bazohet ne standarde europiane që shmang çimentimin e kapjes politike sipas draftit të Ramës dhe që do shpjegohet pikë për pikë nga ekspertet e saj, në qëndrimin qe do i dërgojë komisionit të Venecias”, thuhet në deklaratën e Halimit.
15 janar 2016 (gazeta-Shqip.com)