Spektakël në fushë e në tribuna. Në 89’, Borusia mundet 2-1
Altin Manallari
Bajerni triumfon “in extremis” ndaj Borusia Dortmundit, falë një goli të Robenit në minutën e 89-të dhe shpallet kampion i Europës. Bavarezët fitojnë me rezultatin 2-1 në fund të një ndeshjeje të bukur.
Dortmundi vinte në këtë ndeshje me një mungesë të madhe, atë të të dëmtuarit Gëtce. Klop hedh Grosskrojc në krahun e majtë dhe afron më në qendër Rojs pas shpatullave të sulmuesit të vetëm, Levandovski. Ndërsa në qendër të mbrojtjes ishin vendosur Humels dhe Subotiç. Në anën tjetër, te Bajerni mungonin Batshtuber dhe Kros, prandaj Hajnkes kishte rreshtuar Boateng e Dante në qendër të mbrojtjes, ndërsa i kishte besuar sulmin treshes së mrekullive Robben-Myler-Riberi, të cilët kishin për detyrë të mbështesnin përpara Manxhukiç. Në minutat e para, Bajerni provon të bëjë lojën që nga linja e mbrojtjes, por Borusia është shumë agresive në mesfushën kundërshtare, duke krijuar përshtypjen se po luan më mirë. Bajerni duket shumë i ngadaltë dhe në vështirësi. Pas disa tentativave të gabuara, më në fund skuadra e Klop nis të shfaqet rrezikshëm në portën kundërshtare me Levandovski, Blaszczykovski, Rojs e Benter, por përballë tyre është një super-Nojer, i cili u mohon golin në pritjet e tij të mrekullueshme. Bajerni vuan shumë lojën tokazi dhe duket i bllokuar në gjysmëfushën e tij, ndërsa Borusia është padrone e fushës. Në minutën e 28, Bajerni tregon se është në fushë dhe vetëm një pritje e madhe e Vajdenfeler i mohon golin Manxhukiç. Pak minuta më vonë, Roben ka një rast të pastër për të zhbllokuar ndeshjen, por portieri i verdhezinjve është i pakalueshëm edhe këtë herë. Rastet shkojnë sa në një portë në tjetrën. Levandoski kalon Boatengun në minutën e 35-të, por ndalet sërish nga një Nojer i jashtëzakonshëm. Në të 45-tën, Roben nga një pozicion i shkëlqyer për të shënuar, i vetëm me portierin Vajdenfeler, gjuan në fytyrën e këtij të fundit. Shumë emocione, por asnjë gol në 45 minutat e para në “Uembli”. Si në pjesën e parë, Borushia e nis më mirë, krijon më shumë, por rastet lënë për të dëshiruar. Bajerni provon të përmirësojë lojën e tij dhe arrin të zhbllokojë rezultatin në minutën e 60 me golin e Manxhukiç me portën bosh, pas një asisti të Robenit. Por 7 minuta më vonë, Rojs hyn në zonë, por ndalet me faull nga Dante. Gjyqtari Ricoli tregon me gisht pikën e bardhë të 11-metërshit, nga ku Gyngon shënon golin e barazimit 1-1. Ndizet ndeshja. Në të 72-tën, Subotniç shpëton Dortmundin, kur largon një top të Mylerit pak larg vijës fatale, me Robenin që ishte shumë pranë. Tani është Bajerni zot i fushës dhe Dortmundi që vuan. Alaba lëshon një raketë në drejtim të portës, por Vajdenfeler grushton fluturimthi. Skuadra e Hajnkesit duket më e freskët dhe i imponon kundërshtarit ritëm të lartë loje. Vajdenfeler bën mrekullinë edhe në gjuajtjen e Shvajnshtajger. Dhe kur dukej se gjithçka po shkonte drejt kohëve shtesë, vetëm një minutë nga fundi, Roben (që kishte gabuar në dy raste të pastra në këtë ndeshje) përfiton një top në një rrëmujë në hyrje të zonës së verdhezinjve, avancon dhe me një gjuajtje të lehtë mposht portierin e Dortmundit me golin e avantazhit 2-1. Goditje fatale për djemtë e tmerrshëm të Jurgend Klop, të cilët u dorëzohen lotëve të zhgënjimit. Ndërsa për Bajernin nis festa e çmendur. Më në fund, fitojnë finalen, një vit pasi e kishin humbur kundër Çelsit. Trofeu i pestë për bavarezët, po aq sa edhe Liverpuli.
Bajern-Borusia
Përleshen tifozët në Londër para finales
Tension i lartë në Londër përpara finales së “Uemblit”. Kur kishin mbetur pak orë para nisjes së finales së Champions ndërmjet Bajernit të Mynihut dhe Borusias së Dortmundit, situata është tensionuar në kryeqytetin anglez, aty ku dhe dje në mbrëmje u luajt kjo ndeshje e madhe. Mediat e huaja raportojnë se janë përleshur tifozët e të dy klubeve, që njëkohësisht janë edhe rivalët më të mëdhenj në Gjermani. Raportohet se përplasja në mes tifozëve ka nisur pas orës 9:00 të mëngjesit. Rrahja ka zgjatur disa minuta e më pas u desh të ndërhynte policia e Londrës për të qetësuar situatën. Nuk është lajmëruar për të plagosur. Gjithsesi forcat e rendit dje kanë pasur shumë punë me tifozeritë e të dyja skuadrave, të cilat kishin pushtuar qytetin e Londrës.
2012/2013 BAJERN
2011/2012 ÇELSI (ENG)
2010/2011 BARCELONA (ESP)
2009/2010 INTER (ITA)
2008/2009 BARCELONA (ESP)
2007/2008 MAN UTD (ENG)
2006/2007 MILAN (ITA)
2005/2006 BARCELONA (ESP)
2004/2005 LIVERPUL (ENG)
2003/2004 PORTO (POR)
2002/2003 MILAN (ITA)
2001/2002 REAL MADRID (ESP)
2000/2001 BAJERN (GER)
1999/2000 REAL MADRID (ESP)
1998/1999 MAN UTD (ENG)
1997/1998 REAL MADRID (ESP)
1996/1997 BO. DORTMUND (GER)
1995/1996 JUVENTUS (ITA)
1994/1995 AJAX (NED)
1993/1994 MILAN (ITA)
1992/1993 MARSEJA (FRA)
1991/1992 BARCELONA (ESP)
1990/1991 YLLI I KUQ BEOGRAD (SRB)
1989/1990 MILAN (ITA)
1988/1989 MILAN (ITA)
1987/1988 PSV (NED)
1986/1987 PORTO (POR)
1985/1986 STEAUA (ROU)
1984/1985 JUVENTUS (ITA)
1983/1984 LIVERPOOL (ENG)
1982/1983 AMBURGO (GER)
1981/1982 ASTON VILA (ENG)
1980/1981 LIVERPUL (ENG)
1979/1980 NOTINGHEM (ENG)
1978/1979 NOTINGHEM (ENG)
1977/1978 LIVERPUL (ENG)
1976/1977 LIVERPUL (ENG)
1975/1976 BAJERN (GER)
1974/1975 BAJERN (GER)
1973/1974 BAYERN (GER)
1972/1973 AJAKS(NED)
1971/1972 AJAKS (NED)
1970/1971 AJAKS (NED)
1969/1970 FEYENORD (NED)
1968/1969 MILAN (ITA)
1967/1968 MAN UTD (ENG)
1966/1967 SËLLTIK GLASGOU (SCO)
1965/1966 REAL MADRID (ESP)
1964/1965 INTER (ITA)
1963/1964 INTER (ITA)
1962/1963 MILAN (ITA)
1961/1962 BENFIKA (POR)
1960/1961 BENFIKA (POR)
1959/1960 REAL MADRID (ESP)
1958/1959 REAL MADRID (ESP)
1957/1958 REAL MADRID (ESP)
1956/1957 REAL MADRID (ESP)
1955/1956 REAL MADRID (ESP)