Mbrëmjen e djeshme në afërsi të Prefekturës së Fierit, një person mbeti i plagosur pasi një sherr i ndodhur jashtë ambienteve të një pike bastesh degjeneroi deri në përdorimin e thikës.
Policia ka zbardhur ngjarjen, ku mbeti i plagosur 32-vjeçari me iniciale A.J. dhe ka shpallur në kërkim dy autorët e dyshuar të ngjarjes.
“Pas ngjarjes së ndodhur më datën 14.04.2018, rreth orës 21:25 në afërsi të Prefekturës Fier, ku mbeti i plagosur shtetasi A.J, 32 vjeç, banues në Fier, Policia e Fierit ngriti një grup të posaçëm hetimor për zbardhjen e ngjarjes. Nga hetimet paraprake dhe nga informacionet e siguruara, dyshohet se shtetasi A.J, pasi është konfliktuar fizikisht në një lokal për motive të dobëta me shtetasit E.H.M, 25 vjeç dhe E.D.M, 25 vjeç, të dy banues në Patos (djem xhaxhallarësh), është qëlluar me thikë nga shtetasi E.H.M. Gjithashtu njëri prej autorëve ka qëlluar edhe me armë zjarri pistolet në drejtim të shtetasit A.J por nuk ka pasur plagë të shkaktuara nga arma”, njofton policia.
Unifomrat blu po punojnë intensivisht për kapjen e autorëve dhe zbardhjen e plotë të rrethanave të ngjarjes. Materialet i kanë kaluar Prokurorisë pranë Gjykatës së Shkallës së Parë Fier për veprat penale “Vrasje me dashje, e mbetur në tentativë e kryer në bashkëpunim” dhe “Prodhimi dhe mbajta pa leje e armëve dhe municionit luftarak” parashikuar nga nenet 76/22/25 dhe 278/2 të Kodit Penal.
15 prill 2018 (gazeta-Shqip.com)