Amerikanët kërkojnë ndjesë. Polakët jemi fyer nga shprehja e Obamës: “Kamp përqendrimi polak”
Një “gafë” e presidentit amerikan, Barack Obama, ka krijuar tension diplomatik mes Polonisë dhe SHBA-së. Kryeministri polak, Donald Tusk, është shprehur se pret më tepër se disa falje formale për shprehjen: “kamp përqendrimi polak” e përdorur nga Obama, teksa i referohej një strukture e përdorur nga nazistët për të shfarosur hebrenjtë.
Numri 1 i Shtëpisë së Bardhë, e kishte përdorur frazën gjatë ceremonisë së dorëzimit të një medaljeje pas vdekjeje për Jan Karski, ish-zyrtar polak, i cili dha dëshmi të mizorive të kryera mbi hebrenjtë nga nazistët.
“Kërkojmë falje, por bëhet fjalë për një gabim të shprehuri të presidentit”, ka deklaruar Tommy Vietor, zëdhënës i Shtëpisë së Bardhë. Megjithë deklaratat e amerikanëve, për kryeministrin polak ndjesa publike nuk ka qenë e mjaftueshme. Sipas tij populli polak ka mbetur i brengosur nga gabimi i Obamës.
“Jam i bindur se miqtë tanë amerikanë mund të bëjnë më tepër për ti dhënë fund njëherë e përgjithmonë, gabimeve të tilla”, ka deklaruar Tusk. Ndërkaq opozita dhe opinioni publik polak kanë protestuar ndaj shprehjes së përdorur nga Obama. Ish-kryeministri polak, konservatori Jaroslaw Kaczynski, është shprehur se Obama: “Ka fyer polakët”.
Qeveria polake ka qenë gjithmonë e kujdesshme për mënyrën sesi media në të gjithë botën shprehet rreth “kampeve të vdekjes”, që kontrolloheshin nga gjermanët në Poloninë e pushtuar. Kjo për faktin se Polonia kërkon të shmangë në çdo mënyrë, koston që mund të sjelli përshtypja e një përgjegjësie nga ana e polakëve për masakrat.
30 maj 2012 (gazeta-Shqip.com)