20-vjeçari është i akuzuari kryesor për vrasjen e 37-vjeçares, më 7 gusht, tek Fusha e Aviacionit
Gjykata e Tiranës vendosi masën e sigurisë “arrest me burg” për 20-vjeçarin Aldo Hoxha, i dyshuari kryesor për vrasjen e Fatbardha Tafës gjatë një tentative për t’i vjedhur varësen e floririt që mbante në qafë
Procesi gjyqësor në Gjykatën e Tiranës ndaj 20-vjeçarit nisi pas një ndërprerje prej 30 minutash të kërkuar nga avokati mbrojtës i tij, Arben Qeleshi, i cili kërkoi kohën e nevojshme për t’u njohur me aktet dhe dosjen hetimore.
Sipas prokurorisë, ka prova të sigurta që faktojnë akuzat ndaj të akuzuarit Hoxha dhe një nga prova kryesore ndaj të tij është fija e flokut të viktimës të gjetur në kapelën ngjyrë jeshile të errët të 20-vjeçarit, e cila përputhet me atë të përshkruar edhe nga motra e viktimës, Tafa e cila mbeti edhe vete e plagosur gjatë agresionit.
Pas kësaj, gjykatësi Neritan Cena pranoi kërkesën e organit të akuzës për caktimin e masës “arrest me burg” ndaj Hoxhës.
Aldo Hoxha u arrestua tri ditë më parë, pas një sërë operacionesh intensive të forcave të policisë së kryeqytetit dhe pasi u shoqëruan në Komisariat një numër i madh kontigjentesh kriminalë, mes të cilëve motra e viktimës, Lumturie Gjana ka identifikuar 20-vjeçarin. Ndërkohë, hoxha nuk e ka pranuar në asnjë moment krimin, duke u shprehur se nuk ka asnjë lidhje me vrasjen e 37-vjeçares Fatbardha Tafa, madje edhe të afërmit e tij kanë nxjerrë alibinë se djali i tyre, ditën e ngjarjes ka qenë në shtëpi gjatë gjithë kohës.
Fatbardha Tafa u qëllua për vdekje me thikë nga dy të rinj me motor në tentativë për t’i grabitur varësen e floririt që mbante me vete. Në ngjarjen e rëndë, të ndodhur pasditen e 7 gushtit në zonën e Fushë së Aviacionit, mbeti e plagosur edhe motra e saj, Lumturie Gjana.
14 korrik 2012 (gazeta-Shqip.com)