Festivali i 13 i Filmit Shqiptar do të mbahet nga datat 3-9 nëntor në kinema “Millenium”. Aktori Robert Ndrenika do të jetë president nderi i festivalit, ndërkohë që programi parashikon 15 filma artistikë, 19 filma të shkurtër, 17 filma dokumentarë, 12 filma vizatimorë
Në Tiranë, aktori Remo Girone dhe drejtori i fotografisë, Nino Celeste
Shfaqja e kopjes së restauruar të filmit “Nëntori i Dytë” do të çelë nesër, në orën 18.00 në kinema “Millenium”, Festivalin e 13 të Filmit Shqiptar. Realizimi i vitit 1982 me regji të Viktor Gjikës tashmë vjen në pelikulë të pastër. Këto kohë është folur vazhdimisht për etapat e restaurimit të këtij filmi, i pari i projektit të bashkëpunimit mes AQSHF-së me “Colorlab Corp”, në Washington DC të SHBA-së. Aktori Robert Ndrenika, njëkohësisht edhe president nderi i festivalit, i cili në këtë film luan rolin e Hakiut, do të jetë prezent gjatë premierës e po ashtu edhe aktori Bujar Lako, i cili ka rolin e Luigj Gurakuqit, ndërkohë që imazhi që Sandër Prosi i ka dhënë Ismail Qemalit, është ai me të cilin shumë shqiptarë e identifikojnë themeluesin e pavarësisë. Festivali do të vazhdojë me shfaqjen speciale të dokumentarit “Anija” të regjisorit Roland Sejko, ora 21.30. Sejko vjen nga Italia për të prezantuar këndvështrimin e tij mbi eksodin shqiptar të fillimviteve ’90. Gjatë ditëve të festivalit do të prezantohen krijimet më të mira të pesë viteve të fundit të kinematografisë shqiptare. Në program janë parashikuar 15 filma artistikë, 19 filma të shkurtër, 17 filma dokumentarë, 12 filma vizatimorë, ndërkohë që jashtë konkurrimit janë 43 filma të studentëve, të cilët do të shfaqen çdo ditë në Teatrin Kombëtar të Komedisë. Filmat janë përzgjedhur nga një komision i ngritur për këtë aktivitet, i përbërë nga regjisorët Esat Musliu, Kristaq Mitro, Eno Milkani. Drejtori i Qendrës Kombëtare Kinematografike ka bërë të ditur se të ftuar të festivalit do të jenë aktori i njohur italian Remo Girone, i njohur për publikun si Tano Karidi, drejtori i fotografisë Sebastiano (Nino) Çeleste, i cili pas viteve ’90 ka bashkëpunuar edhe me aktorë shqiptarë. Për këtë arsye do të ketë edhe një work shop me studentë shqiptarë të Akademisë së Arteve me praninë edhe të kineastëve shqiptarë. Një ftesë i ishte dërguar edhe aktorit të njohur De Niro, por duke qenë i angazhuar në sheshxhirim nuk ka mundur të udhëtojë drejt Tiranës.
Remo Girone
I pranishëm gjatë ditëve të festivalit do të jetë edhe drejtori i “Giffoni Film Festival” në Itali, Claudio Gubitosi, por edhe një pjesë e stafit realizues të filmit “Besa-Premtimi” i regjisores amerikane Rachel Goslins, film dokumentar që trajton historinë e hebrenjve në Shqipëri e që do të ketë shfaqjen speciale më 8 nëntor, ditën e fundit të programit. Gjatë ditëve të festivalit të pranishëm do të jenë edhe disa aktorë shqiptarë që e zhvillojnë karrierën jashtë vendit, si Arta Dobroshi, e cila luan në filmin e shkurtër “OK” të regjisores nga Kosova Blerta Zeqiri, Luli Bitri dhe Karafil Shena si aktorët kryesorë të filmit “Amnistia” të Bujar Alimanit, aktori Kasem Hoxha që jeton në Gjermani, aktori nga Kosova Enver Petrovci si pjesë e filmit “Sekretet” me regji të Spartak Pecanit etj. Për të vlerësuar filmat në konkurrim janë ngritur dy juri. Juria e filmit të gjatë kryesohet nga regjisori i njohur Muharrem Fejzo, i cili gjatë këtyre viteve nuk ka qenë i pranishëm në Shqipëri, shkrimtari dhe publicisti Aurel Plasari, regjisori irlandez Mark Cousins, regjisori kosovar Isa Qosja (fitues e edicionit të shkuar me filmin “Kukumi”), regjisori italian Claudio Fragasso. Një juri e përbërë nga shqiptarë dhe të huaj, një formulë që sipas drejtorit të Qendrës Kombëtare Kinematografike, Artan Minarollit, do të shmangte kontestimet që ka pasur në të shkuarën ndaj jurisë shqiptare. Juria e filmave të shkurtër, dokumentarë e vizatimorë përbëhet nga aktori kosovar që jeton në Vjenë, Astrit Alihajdaraj, shkrimtari dhe publicisti Mujë Buçpapaj, aktori dhe producenti kosovar Arben Zharku, drejtor i festivalit “Skena –UP”. Këtë vit, realizimi i këtij festivali në 100-vjetor është përballur me një buxhet më të vogël, edhe nga ai i premtuar në fillim, që në shifra është më i vogël se ai i festivalit të vitit 2006. Festivali i 13 i Filmit Shqiptar do të mbyllet më 9 nëntor, me një ceremoni çmimesh në Teatrin e Operës dhe Baletit. O. Lila
Çmimet e festivalit
1. Filmi Artistik më i Mirë
2. Regjia e Filmit Artistik më të Mirë
3. Muzika e Filmit Artistik më të Mirë
4. Aktori më i Mirë
5. Aktorja më e Mirë
6. Aktori më i Mirë për Rolet e Dyta
7. Aktorja më e Mirë për Rolet e Dyta
8. Filmi Dokumentar më i Mirë
9. Filmi Vizatimor më i Mirë
10. Filmi i Shkurtër më i Mirë
11. Çmimi Special i Jurisë
12. Çmimi i Karrierës
13. Çmimi “Kinema Millenium”
Filmat artistikë
1. Pharmakon Joni Shanaj
2. E pakapshme Andi Deliana
3. Amnistia Bujar Alimani
4. Ballkan Bazar Edmond Budina
5. Maya Pluton Vasi
6. Shqiptari Johannes Naber
7. Gomarët e Kufirit Jeton Ahmetaj
8. Lindje-Perëndim-Lindje Gjergj Xhuvani
9. Muajt e Mjaltit Goran Paskaljević
10. Përtej Rrugës Yll Çitaku
11. Gjallë Artan Minarolli
12. Ne dhe Lenini Saimir Kumbaro
13. Sekretet Spartak Pecani
14. Koha e Kometës Fatmir Koci
15. Mao-Ce-Dun Besnik Bisha
Filma të shkurtër
1. Një sy mbyllur Andamion Murataj
2. Matanë lumit Sabir Kanaqi
3. Bodrumi Arian Mustafa
4. Para perëndimit të diellit Kled Kapexhiu
5. Dita e fundit e Loro Shestanit Sokol Keraj
6. Ngushtë Xhoslin Rama
7. Nusja Korab Lecaj
8. Refren për Kosovën Dhimitër Ismailaj
9. Dritë në errësirë Namik Ajazi
10. Homazh Ermela Teli
11. Si qeni n’rrush Driton Hajredini, Yll Çitaku
12. Në përvjetorin e martesës Artan Malaj
13. Shkallët Ilir Harxhi
14. Shenjtorja Eno Milkani
15. OK Blerta Zeqiri
16. Busulla Bujar Alimani
17. Hekurishtja Burim Haliti
18. Rri zgjuar Blerime Topalli
19. 24 orëshi i një 10000 lekëshi Redi Treni
Filma dokumentarë
1. 100 vjet me Himnin e Flamurit Petrit Ruka
2. Sekreti i Akiut Merita Çoçoli
3. S’është Lavazh Gentian Koçi
4. Martirët Saimir Kumbaro
5. Flamuri Lorina Pepo
6. Skënderbeu Vladimir Prifti
7. 20 vjeç Borin Leka
8. Rrugë Sabir Kanaqi
9. Pushtimet biometrike Redi Mazi
10. Pamundësia Zhejniva Garo
11. Rojtari i bjeshkëve Antoneta Kastrati
12. Ëndrra e Çamërisë Kujtim Gjonaj
13. Beratinus Ylli Pepo
14. Iso Polifonia Ibrahim Muçaj
15. Kur vriteshin poetët Namik Ajazi
16. Përcjellja Mevlan Shanaj
17. Ventotenne Petro Lati