Një garë argëtuese për ngrënien e shalqirit në Brazil ka marrë një kthesë tragjike, kur një burrë 37-vjeçar, Carlos Cerasoma, humbi jetën nga asfiksia gjatë konkurimit, para syve të bashkëshortes së tij. Ngjarja ndodhi më 11 dhjetor në një vendpushim në Sao Pedro.
Cerasoma kishte marrë pjesë në një konkurs ku pjesëmarrësit duhej të hanin shpejt një copë shalqiri, pa përdorur duar, për të fituar një çmim simbolik – një porcion patate të skuqura. Pas disa minutash, 37-vjeçari filloi të tregonte shenja të mbytjes dhe një roje plazhi u thirr menjëherë, ndërsa disa persona të pranishëm përpiqeshin të ofronin ndihmën e parë dhe të kryenin reanimim kardiopulmonar (CPR). Megjithatë, pavarësisht përpjekjeve, ai u dërgua urgjentisht në spital, ku fatkeqësisht ndërroi jetë. Shkaku i vdekjes u regjistrua si asfiksi për shkak të bllokimit të rrugëve të frymëmarrjes.
Bashkëshortja e tij, Kimberly Santos, ka shpjeguar për mediat se tavolina e përdorur në garë ishte shumë e ulët për gjatësinë e burrit të saj, duke e detyruar atë të përkulej më shumë se normalisht, çka mund të ketë kontribuar në incident. Ajo gjithashtu ka theksuar se në vendngjarje nuk kishte një ekip mjekësor të pranishëm dhe se ndihma ishte ofruar vetëm nga kalimtarë të rastësishëm.
Kimberly Santos ka njoftuar se ka ndërmend të ndërmarrë veprime ligjore për të kërkuar një hetim të plotë mbi rrethanat e kësaj tragjedie, duke kërkuar përgjegjësi për ngjarjen dhe kushte më të sigurta për organizimin e ngjarjeve të tilla në të ardhmen.