Protesta studentore në Tiranë ka marrë përmasa të dhunshme. Mes tensioneve dhe përplasjeve të vazhdueshme me policinë, studentët vijojnë tubimin me qëllim rrëzimin e qeverisë. Protesta ka tërhequr vëmendjen e mediave ndërkombëtare ku, agjencia ndërkombëtare e lajmeve Reuters i ka kushtuar një artikull protestave, duke i cilësuar ato si shpërthimin më të dhunshëm të protestave kundër korrupsionit, të cilat kanë nisur që nga muaji maj dhe po përbëjnë një sfidë në rritje për qeverinë e kryeministrit Edi Rama.
Në artikull trajtohen përplasjet e protestuesve me policinë, zjarri në godinën e Ministrisë së Arsimit dhe incidenti në një degë të Iute Credits. Reuters thekson se studentët protestojnë kundër kushteve në universitete, kostove të larta të arsimit dhe mungesës së mbështetjes financiare.
ARTIKULLI I PLOTE:
Ministria e Arsimit e Shqipërisë u përfshi nga flakët të mërkurën gjatë ditës së dytë të protestave studentore kundër korrupsionit dhe arsimit, ndërsa policia përdori gaz lotsjellës dhe topa uji për të shpërndarë turmat në Tiranë. Mijëra protestues u mblodhën përpara Ministrisë së Arsimit të mërkurën. Disa hodhën tulla drejt ndërtesës. Ata thyen barrierat metalike të trotuareve dhe përmbysën kazanët e plehrave, treguan pamjet e Reuters.
Një degë e Raiffeisen Bank aty pranë u përfshi gjithashtu nga flakët, tha një dëshmitar për Reuters. Ky ka qenë shpërthimi më i dhunshëm i protestave kundër korrupsionit, të cilat filluan në maj dhe kanë paraqitur një sfidë në rritje për qeverinë e kryeministrit Edi Rama.
“Protesta është një e drejtë legjitime, por nuk mund të përdoret si justifikim për dhunë, shkatërrim qyteti apo përleshje të shëmtuara në mes të rrugës”, tha zëvendëskryeministrja Albana Koçiu në Facebook. “U bëj thirrje studentëve dhe çdo qytetari të ndershëm që beson në të drejtën për të protestuar: Distancohuni nga dhuna dhe vandalizmi!” Organizatorët e studentëve thanë se protesta ishte për kushtet në universitete, kostot e arsimit të lartë, mbështetjen financiare dhe perspektivat e punësimit pas diplomimit.
Trazirat janë pjesë e një vale më të gjerë aktivizmi studentor që ka përfshirë Evropën lidhur me arsimin dhe kushtet e jetesës. Në Francë, nxënësit e shkollave të mesme kanë organizuar javë të tëra protestash dhe bllokimesh shkollash duke kërkuar më shumë mësues dhe ambiente më të mira, duke argumentuar se ndërtesat shkollore në përkeqësim dhe klasat e mbipopulluara po dëmtojnë arsimin.