Shkencëtarët kanë bërë një zbulim të rëndësishëm që mund të ndryshojë mënyrën se si e kuptojmë historinë e Marsit. Sipas një studimi të fundit, nën sipërfaqen e planetit të kuq mund të kenë ekzistuar rrjedha uji që krijonin kushte të përshtatshme për jetë.
Prej vitesh studiuesit janë përpjekur të gjejnë prova që Marsi mund të ketë pasur jetë në të kaluarën. Hulumtimet e reja sugjerojnë se planeti mund të ketë qenë i banueshëm për shumë më gjatë nga sa mendohej më parë. Analizat e kryera në dunat e lashta të kraterit Gale tregojnë se ujërat nëntokësore kanë vazhduar të lëvizin nën sipërfaqe edhe pasi liqenet dhe lumenjtë e Marsit u zhdukën.
Këto rrjedha uji mund të kenë krijuar ambiente të mbrojtura nga kushtet e ashpra të sipërfaqes, duke ofruar strehë të mundshme për mikroorganizma. Sipas shkencëtarëve, këto zona nëntokësore mund të jenë ndër vendet më premtuese për të kërkuar gjurmë të jetës së lashtë në Mars. Studimi, i publikuar në Journal of Geophysical Research: Planets, ofron një pasqyrë të re mbi mënyrën se si Marsi ka evoluar gjatë miliarda viteve dhe rrit shpresat se planeti mund të ketë pasur kushte të favorshme për jetë në të kaluarën.