Një fermer nga Kosta Rika, i cili ka arritur moshën 119 vjeç, mund të bëhet personi mashkull më i vjetër në botë nëse verifikimi i moshës së tij miratohet zyrtarisht. Bëhet fjalë për José Flores Flores, familja e të cilit ka nisur procedurën e certifikimit pranë “Gerontology Research Group”, organizatë ndërkombëtare që kontrollon të dhënat e personave mbi 100 vjeç.
Sipas regjistrit civil të Kosta Rikës, Flores ka lindur më 11 korrik 1907 në gadishullin Nicoya, një zonë e njohur për numrin e lartë të personave me jetëgjatësi të madhe. Nëse dokumentacioni i tij do të pranohet, ai do të tejkalojë rekordin aktual mashkullor prej 116 vitesh dhe do të shpallet burri më i moshuar në botë.
Aktualisht, titulli i personit më të vjetër të gjallë i përket britanikes Ethel Caterham, e cila pritet të mbushë 117 vjeç më 21 gusht. Një njohje zyrtare e moshës së Flores do ta vendoste atë në krye të listës së rekordeve botërore të jetëgjatësisë. Megjithatë, rasti i tij ka shkaktuar debate mes ekspertëve.
Familja ka dorëzuar dokumente të gjendjes civile dhe një certifikatë pagëzimi të vitit 1907, por demografi Luis Rosero-Bixby ka ngritur dyshime për shkak të mungesës së disa të dhënave dokumentare gjatë disa dekadave. Sipas tij, nevojiten verifikime të mëtejshme përpara se të merret një vendim përfundimtar për njohjen e rekordit.