Për më shumë se 20 vjet, në Ginosta, një fshat në ishullin italian të Strombolit nuk ka pasur shkollë. Këtë të enjte, si kudo në Itali mësimi ka rifilluar edhe aty, por vetëm një nxënëse është ulur në bankën e shkollës. Ajo është Aysha, e cila sapo ka filluar klasën e parë dhe mësuesja e saj do të japë mësim ekskluzivisht për të. Ginostra ndodhet në Stromboli, një ishull i vogël italian që i përket arkipelagut të Ishujve Aeolianë pranë brigjeve të Siçilisë. Një vullkan aktiv ngrihet mbi shtëpitë e tij të bardha, por banorët përballen gjithashtu me sfidën e përditshme të të qenit të izoluar nga pjesa tjetër e ishullit. Vendbanimi, me popullsinë e tij prej rreth 40 banorësh, mund të arrihet vetëm nga deti në dimër.

Fshatin e tyre vendasit e quajnë “një ishull brenda një ishulli”, por pavarësisht vështirësive për të jetuar aty, një shkollë fillore është rihapur në fshat pas më shumë se dy dekadash. Gjashtëvjeçarja Aysha filloi klasën e parë më 10 shtator. Megjithatë, ajo nuk takoi askënd të moshës së saj në shkollë. Mësuesja e saj u bë Laura Mongi. Mësimet nuk zhvillohen në një ndërtesë tradicionale shkollore, pasi klasa ndodhet në një ambient të rinovuar së fundmi që i përket famullisë së San Vincenzo Ferreri.

Ndërtesa u vu në dispozicion falas falë një marrëveshjeje midis autoriteteve të Liparit dhe kryedioqezës. Kryetari i bashkisë së Liparit, Riccardo Gullo, thekson se vendimi nuk prek vetëm një student, pasi është një përpjekje për të ndalur shpopullimin e ishujve më të vegjël të arkipelagut. “Ky është një hap i vogël. Me krenari dhe kënaqësi të madhe i garantojmë të drejtën për arsim komunitetit tonë të vogël, duke shpresuar se gradualisht do të jemi në gjendje ta ndalojmë shpopullimin”, tha Gullo. Prandaj, shkolla është e vogël në kuptimin më të mirëfilltë, me vetëm një nxënës, një mësues dhe një klasë.

Megjithatë, hapja e objektit nuk ishte një tekë e prindërve. Pa të, familja do të përballej me një zgjedhje shumë të vështirë. Në qytetin kryesor të Strombolit ka një shkollë, por Ginostra nuk ka lidhje rrugore. Për të shkuar në anën tjetër të ishullit, Aysha do të duhej të merrte një varkë. Problemi është se orari i hidrofoilit nuk lejon që udhëtimi të përkojë me orarin e shkollës. Të shkosh në Lipari do të ishte edhe më e vështirë, veçanërisht në dimër, kur lidhjet me varka mund të jenë të parregullta. Alternativa ishte brutalisht e thjeshtë: Ajsha dhe nëna e saj do të duhej të largoheshin nga Ginostra, ndërsa babai i saj do të qëndronte. Monica Abbate dhe Raffa Bazine refuzuan të pranonin një skenar të tillë. Familja kishte zgjedhur me vetëdije të jetonte në Ginostra dhe nuk kishte ndërmend të largohej nga vendbanimi vetëm sepse vajza e tyre kishte arritur moshën shkollore.