Aktorja fituese e Oscar-it, Halle Berry, ka bërë thirrje që gratë dhe burrat të mbrojnë të drejtat e grave në shëndet, veçanërisht në lidhje me menopauzën, duke kritikuar njëkohësisht guvernatorin e Kalifornisë, Gavin Newsom, për veton që ai vendosi mbi ligjin për këtë çështje.
Berry, e cila është bërë një avokate e njohur për kujdesin ndaj grave gjatë menopauzës dhe ka krijuar edhe kompaninë e saj në këtë fushë, foli në konferencën New York Times DealBook Summit në Nju Jork. Ajo kritikoi guvernatorin demokrat, duke thënë se ai “injoron gratë” dhe se nuk duhet të synojë të jetë president në të ardhmen.
Aktorja përgëzoi shtetin e Illinois-it që u bë së fundmi “shteti i parë që e bën të detyrueshme mbulimin e trajtimit hormonal të zëvendësimit”. Megjithatë, ajo kritikoi Newsom, i cili është guvernator i Kalifornisë që nga viti 2019 dhe ka lënë të hapur mundësinë për të kandiduar për zgjedhjet presidenciale të 2028-ës.
“Në shtetin tim të madh, Kaliforninë, guvernatori im, Gavin Newsom, vendosi veto mbi ligjin për menopauzën, jo një, por dy vite radhazi. Por nuk ka problem, ai nuk do të jetë gjithmonë guvernator”, tha Berry. “Dhe mënyra se si injoroi gratë, gjysmën e popullsisë, duke na nënvlerësuar në moshën e mesme, ndoshta nuk duhet të jetë as presidenti ynë i ardhshëm, thjesht e them“.
Ligji AB 432, i cili u rrëzua nga Newsom në tetor, synonte zgjerimin e mbulimit të sigurimeve për kujdesin e menopauzës dhe ofrimin e stimujve për mjekët që do të përfundonin programe trajnimi për peri-menopauzën, menopauzën dhe post-menopauzën.