Deri në vitin 2036, rreth 79.5 milionë gra të moshës 35 vjeç e lart në mbarë botën mund të përballen me infertilitetin. Ky është përfundimi i një studimi të publikuar në revistën shkencore The Lancet Obstetrics, Gynaecology & Women’s Health, i cili tregon se rastet e kësaj gjendjeje po shtohen vazhdimisht, veçanërisht në vendet e zhvilluara.
Studiuesit analizuan të dhëna nga 204 vende dhe rajone, të mbledhura gjatë periudhës 1990–2023. Sipas tyre, në vitin 2023 rreth 53.6 milionë gra të moshës 35–49 vjeç ishin diagnostikuar me infertilitet. Infertiliteti diagnostikohet kur një çift nuk arrin të realizojë shtatzëni pas të paktën 12 muajsh marrëdhëniesh të rregullta seksuale pa mbrojtje. Ai nuk duhet të ngatërrohet me sterilitetin, që nënkupton pamundësi të plotë riprodhuese.
Sipas studimit, situata më shqetësuese është në vendet e Azisë, ndërsa nivelet më të ulëta të infertilitetit janë regjistruar në Australazi, që përfshin Australinë, Zelandën e Re, Guinenë e Re dhe ishujt përreth në Oqeanin Paqësor. Autorët theksojnë se në shumë vende me të ardhura të mesme dhe ekonomi në zhvillim, rritja e infertilitetit lidhet me ndryshimet sociale dhe demografike. Gjithnjë e më shumë njerëz martohen më vonë dhe shtyjnë prindërimin, ndërsa është rritur edhe ndërgjegjësimi për problemin dhe numri i çifteve që kërkojnë ndihmë mjekësore.
Megjithatë, trajtimi i infertilitetit mbetet i kushtueshëm ose i vështirë për t’u siguruar në shumë vende, ndërsa kërkesa për shërbime shëndetësore po rritet më shpejt se mundësitë për t’i ofruar ato. Shkencëtarët kujtojnë gjithashtu se me kalimin e moshës pakësohet rezerva ovariane dhe bie aftësia natyrore për fekondim, duke rritur rrezikun e aborteve spontane dhe duke ulur suksesin e teknikave të riprodhimit të asistuar. Parashikimet tregojnë se rritja më e madhe e rasteve të infertilitetit gjatë dekadës së ardhshme pritet te gratë e grupmoshës 35–39 vjeç.